దుల్కర్ సల్మాన్, రానా దగ్గుబాటి కలిసి నిర్మించిన ‘కాంత’ చిత్రం నవంబర్ 14న థియేటర్లలోకి వచ్చింది. పీరియడ్ మిస్టరీ డ్రామాగా తెరకెక్కిన ఈ సినిమాపై ముందు నుంచీ మంచి అంచనాలే ఉన్నాయి. దానికి తగినట్లే, సినిమాకు మంచి ఆరంభం లభించింది.

ఈ సినిమాకు సెల్వమణి సెల్వరాజ్ దర్శకుడిగా పరిచయమయ్యారు. 1950ల మద్రాస్ నేపథ్యంలో ఈ కథ నడుస్తుంది. ఒక డైరెక్టర్ (సముద్రఖని), ఆయన శిష్యుడైన సూపర్ స్టార్ (దుల్కర్ సల్మాన్) మధ్య జరిగే ‘ఈగో వార్’ ప్రధాన కథాంశం. ఈ చిత్రంలో భాగ్యశ్రీ బోర్సే కథానాయికగా నటించింది.

సినిమాకు రివ్యూలు మాత్రం మిక్స్‌డ్‌గా వచ్చాయి. ముఖ్యంగా, ఫస్టాఫ్ చాలా బలంగా, ఆకట్టుకునేలా ఉందని, కానీ సెకండాఫ్ మాత్రం ఒక రొటీన్ ఇన్వెస్టిగేటివ్ థ్రిల్లర్‌లా మారిపోయిందని చాలా మంది అభిప్రాయపడ్డారు.

అయితే, నటన పరంగా దుల్కర్ సల్మాన్‌కు విపరీతమైన ప్రశంసలు దక్కుతున్నాయి. చాలా మంది ఇది అతని ‘కెరీర్ బెస్ట్’ పెర్ఫార్మెన్స్ అని, నేషనల్ అవార్డు కూడా దక్కవచ్చని సోషల్ మీడియాలో పోస్టులు పెడుతున్నారు. అలాగే, డెబ్యూ హీరోయిన్ భాగ్యశ్రీ నటన కూడా అద్భుతంగా ఉందని కితాబులిస్తున్నారు.

రానా దగ్గుబాటి ఇందులో ఒక ఇన్వెస్టిగేషన్ ఆఫీసర్ పాత్రలో సెకండాఫ్‌లో కనిపిస్తారు. ఆయన పాత్ర సినిమాకు కీలకంగా మారింది. దుల్కర్ తన వేఫేరర్ ఫిల్మ్స్‌పై, రానా తన స్పిరిట్ మీడియా బ్యానర్‌పై ఈ చిత్రాన్ని సంయుక్తంగా నిర్మించారు.

మొత్తం మీద, రివ్యూలు ఎలా ఉన్నా, ‘కాంత’ ఫస్ట్ డే కలెక్షన్లు మాత్రం బాగానే వచ్చాయి. ప్రీమియర్లు, మొదటి రోజు వసూళ్లతో కలిపి 10.36 కోట్ల గ్రాస్ రాబట్టడం విశేషం. ఈ ఓపెనింగ్స్‌తో సినిమా వీకెండ్‌లో కూడా మంచి  వసూళ్లు సాధించే అవకాశం ఉందని ట్రేడ్ వర్గాలు అంచనా వేస్తున్నాయి.