కాశ్మీర్ రాజకీయ నేపథ్యాన్ని కథాంశంగా తీసుకుని తీసే సినిమాలు గత కొన్నేళ్లుగా ప్రేక్షకుల దృష్టిని బాగా ఆకర్షిస్తున్నాయి. ఈ కోవలో, అక్టోబర్ 7, 2025న నెట్‌ఫ్లిక్స్‌లో విడుదలైన తాజా చిత్రం ‘బారాముల్లా’.తెలుగులో కూడా అందుబాటులో ఉంది.

ఆర్టికల్ 370 ఫేమ్ ఆదిత్య సుహాస్ జంభాలే దీనికి దర్శకత్వం వహించగా, ఆదిత్య ధర్ నిర్మాణ భాగస్వామిగా వ్యవహరించారు. ఈ సినిమా ఒక రకంగా ఒక వినూత్న ప్రయోగం. అదేంటంటే, కాశ్మీర్ పండిట్ల విషాద గాథను పచ్చిగా చూపకుండా, దానికి హారర్ (సూపర్‌నేచురల్) అంశాలను జోడించడం.

కశ్మీర్‌లోని బారాముల్లా ప్రాంతంలో పిల్లలు వరుసగా అదృశ్యమవుతుంటారు. కొత్తగా బదిలీపై వచ్చిన డి.ఎస్.పి. రిద్వాన్ సయ్యద్ (మానవ్ కౌల్) ఈ కేసును డీల్ చేయాల్సి వస్తుంది. అదే సమయంలో, అతని కుటుంబం ఉంటున్న పాత ఇంట్లో కొన్ని అతీంద్రియ శక్తుల అల్లరి మొదలవుతుంది.

మిస్సింగ్ కేసులు, ఇంట్లోని దెయ్యాల వ్యవహారం.. ఈ రెండింటికీ ఒక గట్టి లింక్ ఉంటుంది. ఇంట్లో దెయ్యాలు వేరు కాదు, 1990ల నాటి ఉగ్రవాద దాడిలో ప్రాణాలు కోల్పోయిన కాశ్మీరీ పండిట్ కుటుంబానికి చెందిన ఆత్మలు.

ఈ సినిమా ప్రధానంగా రెండు ట్రాక్‌లపై నడుస్తుంది. మొదటిది రిద్వాన్ ఇన్వెస్టిగేషన్, రెండోది అతని కుటుంబానికి ఎదురయ్యే దెయ్యాల అనుభవాలు. కథ మొదటి గంట నెమ్మదిగా సాగుతుంది, కాస్త గందరగోళంగా కూడా అనిపిస్తుంది. కానీ, విరామం తర్వాత అసలు ట్విస్ట్ రివీల్ అవుతుంది.

కనిపించకుండా పోతున్న పిల్లలను ఉగ్రవాదులు తమ ‘డైపర్ మిలిటెన్సీ’ కోసం కిడ్నాప్ చేస్తుంటే, ఆ అమాయక ఆత్మలు (పండిట్ దెయ్యాలు) వాళ్లను రక్షిస్తున్నాయని తెలుస్తుంది. నిజానికి ఈ సినిమాలో దెయ్యాలు విలన్స్ కాదు, సేవియర్స్! ఇదొక మంచి ఇంటెన్షన్.

మానవ్ కౌల్, అతని భార్య పాత్రలో నటించిన భాషా సుంబ్లి తమ నటనతో ఆకట్టుకున్నారు. మంచుతో కప్పబడిన బారాముల్లా లొకేషన్, ఆర్నాల్డ్ ఫెర్నాండెజ్ సినిమాటోగ్రఫీ సినిమాకు ప్రధాన బలం.

కశ్మీర్ విషయాన్ని హారర్ డ్రామాలో చూపడం అభినందనీయం. కానీ, కథనం కొన్ని చోట్ల అస్తవ్యస్తంగా ఉండడం, ముఖ్యంగా క్లైమాక్స్‌లో వచ్చే పరిష్కారం ‘ఉట్టికి ఎగరలేని అత్త స్వర్గానికి ఎగురుతుందా?’ అన్నట్టుగా చాలా కన్వీనియెంట్‌గా, ఆకస్మికంగా ముగించడంతో నిరాశ కలుగుతుంది. మొత్తానికి, ‘బారాముల్లా’ ఒక బలమైన సామాజిక అంశాన్ని తీసుకుని చేసిన మంచి ప్రయత్నం, కానీ ఎగ్జిక్యూషన్‌లో మాత్రం కాస్త తడబడింది.