ఆంధ్రప్రదేశ్‌లో NTR వైద్య సేవ (గతంలో ఆరోగ్యశ్రీ) పథకంపై నెలకొన్న ప్రతిష్టంభన తొలగిపోయింది. రాష్ట్రవ్యాప్తంగా ఉన్న ప్రైవేట్ ఆసుపత్రులు మంగళవారం NTR వైద్య సేవలను పునరుద్ధరించడానికి అంగీకరించాయి. దీంతో వందలాది మంది రోగులు, ముఖ్యంగా పేదలు, కార్పొరేట్ వైద్య సేవలను ఉచితంగా పొందే అవకాశం మళ్లీ లభించింది.

అసలు వివాదం ఏంటి..?

ప్రైవేట్ ఆసుపత్రులకు, రాష్ట్ర ప్రభుత్వానికి మధ్య గత కొన్ని రోజులుగా బకాయిల చెల్లింపు విషయంలో తీవ్ర వివాదం నెలకొంది. గత ప్రభుత్వ హయాంలో చేసిన వైద్య సేవలకు సంబంధించిన కోట్లాది రూపాయల బకాయిలను ప్రస్తుత ప్రభుత్వం చెల్లించడంలో ఆలస్యం చేయడంతో, ఆసుపత్రుల యాజమాన్యాలు తీవ్ర ఆందోళన వ్యక్తం చేశాయి. ఆర్థిక ఇబ్బందుల కారణంగా, ఈ బకాయిలు చెల్లించే వరకు తాము NTR వైద్య సేవలను నిలిపివేస్తున్నట్లు ప్రైవేట్ హాస్పిటల్స్ అసోసియేషన్ ప్రకటించింది. ఈ నిర్ణయంతో నిరుపేద రోగులకు వైద్య సేవలు అందక తీవ్ర ఇబ్బందులు ఎదురయ్యాయి.

ఈ సంక్షోభాన్ని పరిష్కరించడానికి రాష్ట్ర ఆరోగ్య శాఖ అధికారులు, ప్రైవేట్ ఆసుపత్రుల యాజమాన్య ప్రతినిధులతో పలు దఫాలు చర్చలు జరిపారు. ఈ చర్చలు సఫలం కావడంతో ప్రతిష్టంభనకు తెరపడింది.

ప్రభుత్వం తరపున ఆరోగ్య శాఖ మంత్రి, ముఖ్య కార్యదర్శి హాస్పిటల్స్ అసోసియేషన్‌కు స్పష్టమైన హామీ ఇచ్చారు. పాత బకాయిలను దశలవారీగా, త్వరితగతిన చెల్లించేందుకు కట్టుబడి ఉంటామని, అలాగే ఇకపై బిల్లుల చెల్లింపులో ఆలస్యం జరగకుండా చర్యలు తీసుకుంటామని హామీ ఇవ్వడం జరిగింది. ప్రభుత్వం ఇచ్చిన పక్కా హామీతో సంతృప్తి చెందిన ప్రైవేట్ ఆసుపత్రులు, మానవతా దృక్పథంతో తక్షణమే సేవలను పునఃప్రారంభించడానికి ఒప్పుకున్నాయి.

NTR వైద్య సేవలు పునరుద్ధరణ కాబోతుండటంతో రాష్ట్రంలోని వేలాది పేద, మధ్యతరగతి కుటుంబాలకు ఊరట లభించింది. గుండె సంబంధిత ఆపరేషన్లు, క్యాన్సర్ చికిత్సలు వంటి ఖరీదైన చికిత్సలు నిలిచిపోవడంతో ఆందోళన చెందిన రోగులు, వారి కుటుంబ సభ్యులు ఇప్పుడు ప్రైవేట్ ఆసుపత్రుల్లో తిరిగి వైద్యం పొందనున్నారు. ఈ పథకం కింద 3000కు పైగా చికిత్సలు ఉచితంగా అందుబాటులో ఉన్నాయి.ఏదేమైనా, తాత్కాలికంగానైనా ఈ సంక్షోభం సమసిపోవడం రాష్ట్ర ఆరోగ్య రంగానికి శుభ పరిణామం.