ప్రస్తుతం తన కొత్త చిత్రం ‘ది గర్ల్ ఫ్రెండ్’ ప్రమోషన్స్లో బిజీగా ఉన్న రష్మిక మందణ్ణ, నటుడు జగపతి బాబుతో కలిసి నిర్వహించిన ప్రత్యేక సంభాషణలో పలు వ్యక్తిగత, వృత్తిపరమైన విషయాలను పంచుకున్నారు. ఈ చర్చ మధ్యలో, మహిళలు ఎదుర్కొనే శారీరక ఇబ్బందుల గురించి ప్రస్తావన వచ్చింది. ఈ సందర్భంగా జగపతి బాబు అడిగిన ప్రశ్నకు రష్మిక ఇచ్చిన సమాధానం తక్షణమే నెట్టింట వైరల్గా మారింది.
రుతుస్రావం సమయంలో మహిళలు అనుభవించే శారీరక నొప్పి, మానసిక ఇబ్బందుల గురించి సంభాషణ సాగింది. “మగవారికి కూడా ఒక్కసారైనా పీరియడ్స్ వస్తే బాగుంటుంది అని నీకు అనిపించిందా?” అని జగపతి బాబు ప్రశ్నించగా, రష్మిక ఏ మాత్రం తడబడకుండా “అవును, కచ్చితంగా వస్తే బాగుంటుంది” అని బదులిచ్చారు. దీనికి గల కారణాన్ని వివరిస్తూ, “ఒక్కసారి అయినా ఆ నొప్పి, ఆ భాధ ఎలా ఉంటుందో అనుభవిస్తేనే, పురుషులు స్త్రీల కష్టాన్ని, పరిస్థితిని అర్థం చేసుకోగలరు” అని స్పష్టం చేశారు.
ఈ వ్యాఖ్యలు సోషల్ మీడియాలో పెద్ద చర్చకు దారి తీశాయి. రష్మిక మాటల్లోని నిజాయితీ మరియు స్త్రీల పట్ల ఆమెకున్న సానుభూతిని మెచ్చుకుంటూ ఒక వర్గం నెటిజన్లు ఆమెకు మద్దతు తెలిపారు. రుతుస్రావం అనేది భారతీయ సమాజంలో ఇప్పటికీ బహిరంగంగా మాట్లాడటానికి వెనుకాడే అంశం కావడంతో, ఒక అగ్ర కథానాయిక ఈ విషయాన్ని ఇంత ధైర్యంగా, సూటిగా ప్రస్తావించడంపై సర్వత్రా ప్రశంసలు వ్యక్తమయ్యాయి. మారుతున్న సామాజిక దృక్పథానికి, స్త్రీల ఆరోగ్యం, శారీరక సమతుల్యత పట్ల మరింత అవగాహన అవసరమనే సందేశాన్ని ఈ వ్యాఖ్యలు బలంగా వినిపించాయి.
తన వ్యక్తిగత జీవితంతో పాటు, సినిమా కెరీర్ గురించి కూడా రష్మిక ఆసక్తికర విషయాలు పంచుకున్నారు. దర్శకుడు రాహుల్ రవీంద్రన్ రూపొందించిన ‘ది గర్ల్ ఫ్రెండ్’ చిత్రంలో రష్మిక టైటిల్ రోల్లో నటించారు. నవంబర్ 7న ప్రేక్షకుల ముందుకు రానున్న ఈ చిత్రం టీజర్, పాటలు ఇప్పటికే ప్రేక్షకులను ఆకట్టుకున్నాయి. ఈ చిత్రంలో దీక్షిత్ శెట్టి హీరోగా నటించారు. విజయ్ దేవరకొండతో తన సంబంధం గురించి కూడా రష్మిక ఈ షోలో మాట్లాడినట్లు సమాచారం.
సాధారణంగా సినిమా ప్రమోషన్లలో భాగంగా తారలు చేసే వ్యాఖ్యలు కేవలం పబ్లిసిటీకే పరిమితం కాకుండా, రష్మిక చేసిన ఈ వ్యాఖ్యలు మాత్రం స్త్రీల సమస్యలపై సమాజంలో ఒక లోతైన ఆలోచనకు బీజం వేశాయని చెప్పవచ్చు. ఒక స్టార్ నటిగా రష్మిక.. సినిమాతో పాటు సామాజిక అంశాలపై కూడా తన అభిప్రాయాన్ని నిర్భయంగా వ్యక్తపరచడం అభినందనీయం.
