నవంబర్ 21న విడుదలకు సిద్ధమవుతున్న చిత్రం ‘రాజు వెడ్స్ రాంబాయి’ . వేణు ఊడుగుల నిర్మాణంలో తెరకెక్కిన ఈ సినిమా ప్రీ-రిలీజ్ ఈవెంట్ ఇటీవల ఘనంగా జరిగింది. ఈ వేదికపై దర్శకుడు సాయిలు కంపాటి చేసిన వ్యాఖ్యలు ఇప్పుడు సోషల్ మీడియాలో వైరల్ అవుతున్నాయి.
సాధారణంగా దర్శకులు “మా సినిమా బాగుంటుంది, తప్పక చూడండి” అని చెబుతారు. కానీ సాయిలు మాత్రం ఒకడుగు ముందుకేసి, “సినిమా రిలీజయ్యాక నెగిటివ్ టాక్ వస్తే అమీర్పేట్ సెంటర్లో కట్ డ్రాయర్ మీద పరిగెడతా” అని సంచలన శపథం చేశారు. ఖమ్మం-వరంగల్ బోర్డర్లో జరిగిన ఒక యదార్థ ప్రేమకథ ఆధారంగా ఈ సినిమాను తెరకెక్కించామని, కంటెంట్ మీద తనకు పూర్తి నమ్మకం ఉందని ఆయన తెలిపారు.
“మీకు సినిమా నచ్చకపోతే వదిలేయండి, కానీ దయచేసి నెగిటివ్ ప్రచారం మాత్రం చేయకండి. ఇది ఊరి ఎమోషన్ ఉన్న సినిమా. చూశాక మీ సొంత ఊరు, మీ ప్రేమలు గుర్తొస్తాయి,” అని ఆయన ఎమోషనల్ అయ్యారు. అఖిల్ రాజ్, తేజస్విని రావు జంటగా నటించిన ఈ చిత్రంలో సిద్దు జొన్నలగడ్డ సోదరుడు చైతు జొన్నలగడ్డ కూడా కీలక పాత్రలో కనిపిస్తున్నారు. మరి డైరెక్టర్ నమ్మకాన్ని ప్రేక్షకులు నిజం చేస్తారో లేదో చూడాలి.
మొత్తానికి, డైరెక్టర్ సాయిలు చేసిన ఈ “అమీర్పేట్ ఛాలెంజ్” సినిమాపై అంచనాలు పెంచడమే కాదు, జనాల్లో ఆసక్తిని కూడా రేకెత్తించింది. ఈ కాన్ఫిడెన్స్ తెరపై వర్కౌట్ అవుతుందో లేదో రేపు తెలియనుంది.
