దశాబ్దాలుగా నెత్తుటి మరకలతో తడిసిన దండకారణ్యం ఇప్పుడు శాంతి బాట పట్టేలా కనిపిస్తోంది. “ఇక పోరాటం చాలు.. ఆయుధాలు వదిలేస్తాం” అంటూ మావోయిస్టులు రాసిన ఒక బహిరంగ లేఖ ఇప్పుడు తెలుగు రాష్ట్రాలతో పాటు దేశవ్యాప్తంగా సంచలనం సృష్టిస్తోంది. మహారాష్ట్ర, మధ్యప్రదేశ్, ఛత్తీస్గఢ్ (MMC) స్పెషల్ జోనల్ కమిటీ అధికార ప్రతినిధి ‘అనంత్’ పేరుతో ఈ లేఖ విడుదలైంది.
అసలేం జరిగింది? కేంద్రం విధించిన ‘మార్చి 2026’ డెడ్లైన్ దగ్గరపడుతున్న వేళ, మావోయిస్టు కోట బీటలు వారుతోంది. ఇప్పటికే అగ్రనేత సోను దాదా (మల్లేజుల వేణుగోపాల్ రావు) లొంగిపోవడంతో షాక్ తిన్న క్యాడర్, ఇప్పుడు ఏకంగా సామూహిక లొంగుబాటుకు సిగ్నల్ ఇచ్చింది. “ప్రపంచ పరిస్థితులు మారుతున్నాయి, సాయుధ పోరాటాన్ని తాత్కాలికంగా ఆపేయాలన్న సోను దాదా, సతీష్ దాదా నిర్ణయాలతో మేం ఏకీభవిస్తున్నాం” అని అనంత్ ఆ లేఖలో పేర్కొన్నారు.
ఫిబ్రవరి 15 డెడ్లైన్ ఎందుకు? తుపాకులు వదిలేయడానికి సిద్ధమే కానీ, తమకు ఫిబ్రవరి 15 వరకు సమయం కావాలని మావోయిస్టులు కోరుతున్నారు. ఈలోపు మూడు రాష్ట్రాల ప్రభుత్వాలు (ఛత్తీస్గఢ్, మహారాష్ట్ర, మధ్యప్రదేశ్) కూంబింగ్ ఆపేయాలని షరతు పెట్టారు. అడవిలో చెల్లాచెదురుగా ఉన్న తమ సహచరులకు ఈ సమాచారం అందించి, అందరితో చర్చించి ఒక నిర్ణయానికి రావడానికి ఈ సమయం కావాలట. “పుండు మీద కారం చల్లినట్లు” భద్రతా బలగాలు విరుచుకుపడుతుంటే చర్చలు సాధ్యం కావని వారి ఆవేదన.
కీలక హామీలు: మావోయిస్టుల చరిత్రలో ఎప్పుడూ లేని విధంగా, ఈసారి పీఎల్జీఏ (PLGA) వారోత్సవాలు కూడా జరపబోమని, అన్ని రకాల దాడులు ఆపేస్తామని మాటిచ్చారు. “మునిగిపోయే పడవను ఎంతకాలం లాగుతాం” అన్నట్లుగా వారి పరిస్థితి తయారైందని విశ్లేషకులు భావిస్తున్నారు. అయితే ఇది నిజంగా మార్పు కోసమేనా లేక సమయం తీసుకుని మళ్ళీ పుంజుకోవడానికా అన్నది పోలీసుల అనుమానం. కానీ, అగ్రనేతల వరుస లొంగుబాట్లు చూస్తుంటే దండకారణ్యంలో ‘ఎర్ర’ జెండా రంగు వెలిసిపోతున్నట్లే కనిపిస్తోంది.
