టాలీవుడ్ వెర్సటైల్ హీరో శర్వానంద్ కథల ఎంపికలో ఎప్పుడూ వైవిధ్యం చూపిస్తుంటారు. ఆయన లేటెస్ట్ స్పోర్ట్స్ యాక్షన్ డ్రామా ‘బైకర్’ (Biker) పై ఇప్పటికే భారీ అంచనాలు నెలకొన్నాయి. యువీ క్రియేషన్స్ (UV Creations) బ్యానర్‌పై అభిలాష్ రెడ్డి కంకర దర్శకత్వంలో తెరకెక్కుతున్న ఈ సినిమా డిసెంబర్ 6న ప్రేక్షకుల ముందుకు రావాల్సి ఉంది. అయితే, తాజాగా ఈ సినిమా విడుదల వాయిదా పడినట్లు నిర్మాణ సంస్థ అధికారికంగా ప్రకటించింది.

 సినిమా పోస్ట్‌పోన్ అవ్వడానికి టెక్నికల్ కారణాలే ప్రధానమని చిత్ర యూనిట్ వెల్లడించింది. కేవలం సినిమాను విడుదల చేయడమే కాకుండా, ప్రేక్షకులకు ఒక సరికొత్త అనుభూతిని ఇవ్వాలనే ఉద్దేశంతో ఈ నిర్ణయం తీసుకున్నట్లు మేకర్స్ తెలిపారు. ‘బైకర్’ చిత్రాన్ని కేవలం 2Dలోనే కాకుండా.. 3D, 4DX ఫార్మాట్లలో కూడా విడుదల చేయబోతున్నారు. ఈ పనుల కోసమే రిలీజ్ డేట్ వాయిదా పడింది. “మా సినిమా కేవలం ఒక కథ కాదు, ఒక ఎక్స్-పీరియన్స్. మీ హెల్మెట్స్ టైట్ చేసుకోండి, కొత్త డేట్ త్వరలో చెబుతాం” అంటూ మేకర్స్ ఆసక్తికర నోట్ రిలీజ్ చేశారు.

 టెక్నికల్ రీజన్స్ అని చెబుతున్నప్పటికీ, డిసెంబర్ రేసులో బాలకృష్ణ ‘అఖండ 2’ వంటి భారీ చిత్రాలు ఉండే అవకాశం ఉండటంతో, బాక్సాఫీస్ క్లాష్ నివారించడానికి కూడా ఇది సరైన నిర్ణయమని సినీ విశ్లేషకులు భావిస్తున్నారు.

 ఈ చిత్రంలో శర్వానంద్ ప్రొఫెషనల్ బైక్ రేసర్‌గా కనిపించనుండగా, మాళవిక నాయర్ హీరోయిన్‌గా నటిస్తోంది. మూడు తరాల కథగా, రేసింగ్ నేపథ్యంలో ఎమోషనల్ డ్రామాగా ఈ చిత్రం రూపొందుతోంది. గిబ్రాన్ సంగీతం అందిస్తున్నారు. కొత్త రిలీజ్ డేట్‌పై త్వరలోనే స్పష్టత రానుంది.