నందమూరి బాలకృష్ణ, దర్శకుడు బోయపాటి శ్రీను కాంబినేషన్ అంటేనే బాక్సాఫీస్ వద్ద సునామీ. వీరికి తమన్ ఎస్ సంగీతం తోడైతే, అది కేవలం సినిమా కాదు… అభిమానులకు ఒక పూనకం.
‘అఖండ’ సృష్టించిన ప్రభంజనం తర్వాత, ఇప్పుడు అంతా ‘అఖండ 2: తాండవం’ కోసం కళ్ళల్లో వత్తులేసుకుని ఎదురుచూస్తున్నారు.డిసెంబర్ 5న ఈ మాస్ ఎంటర్టైనర్ ప్రపంచవ్యాప్తంగా థియేటర్లలోకి రానుంది. ఈ సందర్భంగా జరిగిన ‘తాండవం’ సాంగ్ లాంచ్/ప్రీ-రిలీజ్ ఈవెంట్లో సంగీత దర్శకుడు తమన్ ఏకంగా అభిమానులందరికీ ఒక మాస్ వార్నింగ్ ఇచ్చి అందరి దృష్టినీ ఆకర్షించారు.
“మీ స్పీకర్లు జాగ్రత్త: నా బాధ్యత లేదు”
ఎప్పటిలాగే స్టేజ్పైకి ఎంతో ఎనర్జీతో వచ్చిన తమన్, తన స్పీచ్లో బోయపాటి-బాలయ్య కాంబో గురించి గొప్పగా మాట్లాడారు. ఆ తర్వాత వెంటనే అభిమానుల వైపు చూస్తూ… “అఖండ 2 రిలీజ్ అవుతోంది. దయచేసి ఒక రిక్వెస్ట్. ఈసారి నా మీద ఎవరూ కంప్లైంట్స్ చేయొద్దు,” అని మొదలుపెట్టారు.”స్పీకర్లు పాడైపోయాయ్, మైక్ ఆఫ్ అయిపోయిందంటే నేను బాధ్యత తీసుకోను,” అని తమన్ సీరియస్గా చెప్పారు.
అందుకే… “ముందుగానే మీ స్పీకర్లన్నింటినీ సర్వీస్ చేయించి పెట్టుకోండి,” అంటూ నవ్వుతూ వార్నింగ్ ఇచ్చారు. థియేటర్ ఓనర్లకు, ఆడియన్స్కు ఇది తమన్ నుంచి వచ్చిన అతిపెద్ద మాస్ ప్రమోషనల్ ప్రకటనగా మారింది.
నిజానికి, తమన్ ‘వార్నింగ్’ వెనుక పెద్ద మ్యాటరే ఉంది. బాలయ్య-బోయపాటి సినిమాలకు తమన్ ఇచ్చే బ్యాక్గ్రౌండ్ మ్యూజిక్ (BGM) ఎంత పవర్ఫుల్గా ఉంటుందో మనందరికీ తెలుసు. ‘అఖండ’ టైటిల్ సాంగ్, ఆ అఘోరా ఎలివేషన్లకు థియేటర్లలో సౌండ్ సిస్టమ్స్ దద్దరిల్లిపోయాయి. బి.జి.ఎం విషయంలో తమన్కు కంప్లైంట్లు వస్తే, అది తన మ్యూజిక్ ఇంటెన్సిటీని పెంచి చెప్పే టెక్నిక్ అని విశ్లేషకులు అంటున్నారు.
ఈసారి సీక్వెల్లో దానికి మించి డోస్ పెరిగిందని చెప్పడానికి తమన్ ఇలా మాస్ స్టైల్లో హింట్ ఇచ్చారు.అదంతా దైవ శక్తి!తమన్ కేవలం సౌండ్ గురించే కాదు… సినిమా విజయం గురించి కూడా పూర్తి విశ్వాసం వ్యక్తం చేశారు. “ఈ సినిమా బ్లాక్బస్టర్ అని నేను ఇప్పుడే ఎందుకు చెబుతున్నానంటే… ఇది శివుడి ఆశీర్వాదంతో తయారైంది. ఇది కేవలం మా కష్టం కాదు. ఒక దైవ శక్తి ఇందులో ఉంది,” అని తమన్ సగర్వంగా ప్రకటించారు.
బోయపాటి శ్రీను గతంలో ‘సింహా’, ‘లెజెండ్’, ‘అఖండ’ వంటి మూడు భారీ హిట్ల తర్వాత వస్తున్న ఈ నాలుగో ప్రాజెక్ట్పై టీమ్ ఎంత కాన్ఫిడెంట్గా ఉందో తమన్ మాటలు స్పష్టం చేశాయి. బోయపాటి ఎనర్జీ, బాలయ్య ప్యాషన్, తమన్ మ్యూజిక్… ఈ మూడింటి కలయిక ‘తాండవం’తో మరో శివతాండవం చేయబోతోందని ఫ్యాన్స్ ఫిక్స్ అయిపోయారు.
సినిమా యూనిట్ ఇప్పటికే విడుదల చేసిన పవర్ఫుల్ టీజర్, ‘తాండవం’, ‘బాల ఓ బాల’ వంటి పాటలతో హైప్ అమాంతం పెరిగింది. బాలయ్య తన అఘోరా పాత్రలో మరింత భీకరంగా కనిపిస్తుండగా, విలన్గా ఆది పినిశెట్టి, హీరోయిన్గా సంయుక్త మీనన్ నటిస్తున్నారు. బాలీవుడ్ నుంచి ‘బజరంగీ భాయిజాన్’ ఫేమ్ హర్షాలీ మల్హోత్రా టాలీవుడ్కు పరిచయం అవుతోంది. డిసెంబర్ 5న వచ్చే ఈ సినిమా కలెక్షన్ల సునామీ సృష్టించడం ఖాయమని తమన్ తన మాస్ వార్నింగ్తో ముందే చెప్పేశారు.
