నందమూరి బాలకృష్ణ, దర్శకుడు బోయపాటి శ్రీను కాంబినేషన్ అంటే బాక్సాఫీస్ వద్ద రికార్డుల మోతే. వారి గత చిత్రాలు ‘సింహా’, ‘లెజెండ్’, ‘అఖండ’ సృష్టించిన ప్రభంజనం తెలిసిందే. ఇప్పుడు అదే ఊపుతో రాబోతున్న ‘అఖండ 2: తాండవం’ సినిమాపై అంచనాలు ఆకాశాన్ని తాకాయి. సినిమా విడుదలకు సిద్ధమవుతున్న ఈ తరుణంలో, ఆంధ్రప్రదేశ్లో టికెట్ ధరల పెంపు కోసం మేకర్స్ ప్రభుత్వం వద్ద దరఖాస్తు చేయడం టాలీవుడ్లో హాట్ టాపిక్గా మారింది.
రేట్ల పెంపు కోరినా… ‘రీజనబుల్’ ట్యాగ్..!
సాధారణంగా పెద్ద సినిమాలు వస్తున్నాయంటే, నిర్మాతలు, డిస్ట్రిబ్యూటర్లు అడిగే రేట్లు చూసి సామాన్య ప్రేక్షకుడు కంగారు పడతాడు. జేబుకు బాగా చిల్లు పడటం ఖాయమని ఫిక్స్ అవుతాడు. అయితే, ‘అఖండ 2’ టీమ్ మాత్రం తెలివైన వ్యూహాన్ని అమలు చేస్తోందని తెలుస్తోంది. ఏపీలో టికెట్ ధరల పెంపునకు అనుమతి కోరుతూ ప్రభుత్వం వద్ద దరఖాస్తు చేసిన వివరాలు ఇప్పుడు బయటికి వచ్చాయి.
నిర్మాతలు అడిగిన రేట్లు ఇలా ఉన్నాయి:
ప్రీమియర్ షో (డిసెంబర్ 4 రాత్రి): ₹600/- (ఫిక్స్డ్ రేటు)
రెగ్యులర్ షోలు (మొదటి 10 రోజులు):
సింగిల్ స్క్రీన్లలో ₹75/- పెంపు.
మల్టీప్లెక్స్లలో ₹100/- పెంపు.
ఈ ధరలు ఒక పెద్ద సినిమా కోసం నిర్మాతలు అడిగినవి అయినప్పటికీ, ఇటీవల విడుదలైన కొన్ని పాన్-ఇండియా సినిమాల ప్రీమియర్ రేట్లు ₹1000 వరకు ఉండగా, ‘అఖండ 2’ ప్రీమియర్కు ₹600 అడగటం నిజంగా ‘రీజనబుల్ ప్రైసింగ్’గా సినీ వర్గాలు అభివర్ణిస్తున్నాయి. అంటే, రేట్లు పెంచినా.. సామాన్య ప్రేక్షకుడు ఇబ్బంది పడకుండా, థియేటర్కు వచ్చేందుకు మొగ్గు చూపేలా ఈ నిర్ణయం తీసుకున్నారని మార్కెట్ నిపుణులు అంటున్నారు.
‘అఖండ 2’ టీమ్ రేట్ల విషయంలో తీసుకున్న ఈ నిర్ణయం వెనుక ఓ బలమైన కారణం ఉంది. భారీ ఓపెనింగ్స్ కోసం ₹1000 రేటు పెట్టి అభిమానులతో రచ్చ చేయవచ్చు. కానీ, సినిమా లాంగ్ రన్లో నిలబడాలంటే, ఫ్యామిలీ ఆడియన్స్, న్యూట్రల్ ఆడియన్స్ థియేటర్కు రావాలి. ఇటీవల పెరిగిన రేట్ల కారణంగా కొంతమంది ప్రేక్షకులు థియేటర్లకు రావడం మానేశారు. ఆ పొరపాటు చేయకూడదని నిర్మాతలు ముందుగానే హెచ్చరించారు.
నిర్మాత రామ్ ఆచంట, గోపి ఆచంటలు కూడా రేట్ల పెంపు ఉంటుంది, కానీ అది ప్రేక్షకులను భయపెట్టేలా ఉండదని, గ్రౌండ్ లెవల్లో డిస్ట్రిబ్యూటర్లతో చర్చించాకే ధరలు నిర్ణయించామని స్పష్టం చేశారు. కంటెంట్ మీద వారికి ఉన్న నమ్మకం, అలాగే ప్రేక్షకుల జేబుకు భారమనిపించని రేట్లతో థియేటర్లకు జనాలను రప్పించాలనే వ్యూహాన్ని ఈ టీమ్ అమలు చేస్తోంది.
ప్రభుత్వం ఈ దరఖాస్తును పరిశీలించిన తర్వాత, త్వరలోనే అధికారికంగా ఉత్తర్వులు (GO) విడుదల చేసే అవకాశం ఉంది. బాలయ్య విశ్వరూపం, బోయపాటి మార్క్ యాక్షన్ థియేటర్లలో ఏ స్థాయిలో రికార్డులు సృష్టిస్తుందో చూడాలి.
