నందమూరి బాలకృష్ణ, బోయపాటి శ్రీను కాంబినేషన్లో వస్తున్న ‘అఖండ 2: తాండవం’ సినిమా కోసం అభిమానులు ఎంతగానో ఎదురుచూస్తున్నారు. ‘అఖండ’ సృష్టించిన సునామీని మించి ఈ సీక్వెల్ ఉంటుందని అంచనాలు ఆకాశాన్ని అంటాయి. ఈ భారీ బడ్జెట్ చిత్రాన్ని 14 రీల్స్ ప్లస్ బ్యానర్ పై రామ్ ఆచంట, గోపి ఆచంట నిర్మించారు.
సినిమా విడుదల డిసెంబర్ 5న ఉన్నప్పటికీ, బాలయ్య మాస్ స్టామినాను దృష్టిలో ఉంచుకుని, డిసెంబర్ 4 రాత్రి 9:30 గంటలకు ప్రీమియర్ షోస్కు ప్లాన్ చేశారు. దేశవ్యాప్తంగా బుకింగ్స్ అదరగొడుతున్నాయి.
అక్కడ హౌస్ ఫుల్… ఇక్కడ నిల్!
ఆంధ్రప్రదేశ్, తమిళనాడు, కర్ణాటక, ముంబై, ఢిల్లీ వంటి రాష్ట్రాల్లో అడ్వాన్స్ బుకింగ్స్ ఓపెన్ అయ్యి, టికెట్లు హాట్ కేకుల్లా అమ్ముడైపోతున్నాయి. ఏపీలో అయితే ప్రీమియర్ షో టికెట్ ధర ఏకంగా రూ. 600గా నిర్ణయించారు. దీనికి కూడా ప్రభుత్వం నుంచి అనుమతులు వచ్చేశాయి. ఏపీలో ఫ్యాన్స్ హౌస్ ఫుల్ బోర్డులు పెట్టే పనిలో ఉంటే… ఇక్కడ నైజాంలో పరిస్థితి మాత్రం ఇందుకు పూర్తి విరుద్ధం.
ప్రేక్షకులను, బాలయ్య అభిమానులను తీవ్ర నిరాశకు గురిచేస్తూ, నైజాం (తెలంగాణ) ప్రాంతంలో ఇంకా ప్రీమియర్, రెగ్యులర్ షో బుకింగ్స్ ఓపెన్ కాలేదు. నిన్న (డిసెంబర్ 3) సాయంత్రం 6 గంటలకే బుకింగ్స్ తెరుస్తామని నిర్మాతలు ప్రకటించినా… ఆ ప్రకటన గాలిలో దీపంలా మిగిలిపోయింది. ప్రీమియర్స్కు కేవలం కొన్ని గంటల సమయం మాత్రమే ఉండటంతో, నైజాం ఫ్యాన్స్ ఆగ్రహం వ్యక్తం చేస్తున్నారు. సోషల్ మీడియాలో వారి అసహనం స్పష్టంగా కనిపిస్తోంది.
టికెట్ ధరల పెంపుతోనే అసలు చిక్కు!
ఈ ఆలస్యానికి కారణం నిర్మాణ సంస్థల తప్పిదం కాదు, ప్రభుత్వ అనుమతులే అసలు సమస్యగా మారాయి. రాష్ట్రవ్యాప్తంగా టికెట్ ధరలను పెంచుకునేందుకు ‘అఖండ 2’ నిర్మాతలు తెలంగాణ ప్రభుత్వానికి దరఖాస్తు చేసుకున్నారు. భారీ బడ్జెట్ సినిమాలకు టికెట్ ధరలు పెంచుకోవడం ఇప్పుడు టాలీవుడ్లో సర్వసాధారణం అయిపోయింది.
అయితే, ఈ ధరల పెంపు విషయంలో అనుమతులు ఇవ్వడానికి ప్రభుత్వం కాస్త వెనకాడుతోంది. దీని వెనుక పవర్ స్టార్ పవన్ కళ్యాణ్ నటించిన ‘ఓజీ’ సినిమాకు ఎదురైన అనుభవం ఉంది. ఇటీవల ‘ఓజీ’కి టికెట్ హైక్స్, బెనిఫిట్ షోలకు అనుమతులు ఇచ్చినా, చివరి నిమిషంలో హైకోర్టు ఆ జీవోను సస్పెండ్ చేసింది. ఇది నిర్మాతలకు, డిస్ట్రిబ్యూటర్లకు భారీ షాక్ ఇచ్చింది.
జాగ్రత్త పడుతున్న ‘అఖండ 2’ టీమ్!
‘ఓజీ’ విషయంలో జరిగిన గందరగోళం మళ్లీ జరగకూడదని ‘అఖండ 2’ బృందం జాగ్రత్త పడుతోంది. ఎటువంటి న్యాయపరమైన చిక్కులు లేకుండా, కోర్టులో నిలబడేలా పక్కా జీవో ఇస్తేనే బుకింగ్స్ ఓపెన్ చేయాలని నైజాం డిస్ట్రిబ్యూటర్ దిల్రాజు భావిస్తున్నారట. ఈ ఆలస్యం కారణంగా ఫ్యాన్స్ ఫుల్ టెన్షన్తో ఉన్నారు. ఒకవైపు ఏపీలో శివతాండవం మొదలైతే, మరోవైపు సొంత గడ్డపై ఈ పరీక్ష తప్పేలా లేదు.
నిన్న రాత్రికి ఓ క్లారిటీ వస్తుందనుకుంటే, ఈరోజు మధ్యాహ్నానికైనా అనుమతులు వస్తాయా లేదా అనే ఉత్కంఠ నెలకొంది. ఈ జాప్యం కారణంగా ‘అఖండ 2’ మొదటి రోజు వసూళ్లపై, ముఖ్యంగా నైజాం కలెక్షన్లపై ఖచ్చితంగా ప్రభావం చూపే అవకాశం ఉంది. అయితే, ఈ మధ్యాహ్నం బుకింగ్స్ ఓపెన్ అయితే, కలెక్షన్ల రికార్డులు బద్దలవడం ఖాయమని సినీ విశ్లేషకులు అంటున్నారు.
