తెలంగాణ రాజకీయాల్లో ఫిరాయింపుల వ్యవహారంపై కొనసాగుతున్న ఉత్కంఠ మధ్య స్టేషన్ ఘన్పూర్ ఎమ్మెల్యే కడియం శ్రీహరి సంచలన ప్రకటన చేశారు. తాను ఎమ్మెల్యే పదవికి రాజీనామా చేసే ప్రసక్తే లేదని ఆయన స్పష్టం చేశారు. స్పీకర్ గడ్డం ప్రసాద్ కుమార్ తీసుకునే నిర్ణయం మేరకే తన భవిష్యత్ కార్యాచరణ ఉంటుందని తేల్చి చెప్పారు.
బీఆర్ఎస్ నుంచి కాంగ్రెస్ గూటికి చేరిన కడియం శ్రీహరి, దానం నాగేందర్లపై అనర్హత వేటు కోసం బీఆర్ఎస్ ఫిర్యాదు చేసిన సంగతి తెలిసిందే. సుప్రీంకోర్టు ఆదేశాల నేపథ్యంలో స్పీకర్ ఈ కేసుల విచారణను వేగవంతం చేశారు. ఇటీవల నోటీసులు అందుకున్న కడియం శ్రీహరి, నిర్ణీత గడువులోగా అఫిడవిట్ సమర్పించకుండా, స్పీకర్ను కలిసి మరింత గడువు కోరడం చర్చనీయాంశమైంది.
అయితే, తాజాగా ఆయన మీడియా, పార్టీ శ్రేణులతో మాట్లాడుతూ, తన రాజీనామా గురించి వస్తున్న ఊహాగానాలను కొట్టిపారేశారు. “నేను ఎందుకు రాజీనామా చేయాలి? బీఆర్ఎస్ అధినేత కేసీఆర్ గతంలో కాంగ్రెస్ ఎమ్మెల్యేలను తమ పార్టీలో చేర్చుకోలేదా? అప్పుడు వారికి మంత్రి పదవులు కూడా ఇచ్చారు. ఆ ఎమ్మెల్యేలు రాజీనామా చేశారా? బీఆర్ఎస్ చేయించిందా?” అని కడియం శ్రీహరి గట్టిగా ప్రశ్నించారు. ఈ రకమైన డబుల్ స్టాండర్డ్స్ తనకు వర్తించవన్నది ఆయన వాదన.
నియోజకవర్గ అభివృద్ధి కోసమే తాను ప్రస్తుత కాంగ్రెస్ ప్రభుత్వంతో కలిసి పనిచేస్తున్నానని కడియం వివరించారు. పదేళ్ల బీఆర్ఎస్ పాలనలో స్టేషన్ ఘన్పూర్లో ఆశించిన అభివృద్ధి జరగలేదని ఆయన ఆరోపించారు. సీఎం రేవంత్ రెడ్డి తనకు గౌరవం ఇస్తున్నారని, అందుకే నియోజకవర్గానికి రూ. 14 కోట్ల వరకు నిధులు సాధించగలిగానని తెలిపారు. ఈ సందర్భంగా కడియం శ్రీహరి తన రాజకీయ అనుభవాన్ని, గుర్తింపును ప్రస్తావిస్తూ, ‘కడియం అంటే ఒక బ్రాండ్’ అని వ్యాఖ్యానించారు.
మరోవైపు, పంచాయతీ ఎన్నికలు రాబోతున్న నేపథ్యంలో ఆయన కాంగ్రెస్ శ్రేణులను ఉద్దేశించి మాట్లాడారు. ప్రతి గ్రామ పంచాయతీలో కాంగ్రెస్ జెండా ఎగరాలని పిలుపునిచ్చారు. సర్పంచ్ అభ్యర్థులను ఏకగ్రీవంగా ఎన్నుకుంటే ఎమ్మెల్యే నిధుల నుంచి రూ. 10 లక్షలు, ఎన్నికల ద్వారా ఏకగ్రీవమైతే రూ. 25 లక్షలు ఇస్తానని ప్రకటించడం స్థానిక రాజకీయాల్లో హాట్ టాపిక్గా మారింది. ఉప ఎన్నికలు వస్తే పోటీ చేసి, ప్రజల మద్దతుతో గెలుస్తాననే ధీమాను ఆయన బలంగా వ్యక్తం చేశారు. మొత్తానికి, సుప్రీంకోర్టు ఒత్తిడి, స్పీకర్ నిర్ణయమే కడియం రాజకీయ భవిష్యత్తుకు కీలకం కానుంది.
