యువ సామ్రాట్ అక్కినేని నాగ చైతన్య, ‘విరూపాక్ష’ ఫేమ్ డైరెక్టర్ కార్తీక్ వర్మ దండు కాంబినేషన్లో వస్తున్న ‘NC24’ (వర్కింగ్ టైటిల్) చిత్రం నుండి ఒక ముఖ్యమైన అప్డేట్ విడుదలైంది. ఈ చిత్రంలో కథానాయికగా నటిస్తున్న మీనాక్షి చౌదరి ఫస్ట్ లుక్ పోస్టర్ను మంగళవారం హీరో నాగ చైతన్య ఆవిష్కరించారు.
ఈ చిత్రంలో మీనాక్షి చౌదరి “దక్ష” అనే పురావస్తు శాస్త్రవేత్త (Archaeologist) పాత్రలో కనిపించనున్నారు. విడుదలైన పోస్టర్లో ఆమె ఒక చీకటి గుహలో, చేతిలో మ్యాగ్నిఫైయింగ్ గ్లాస్తో ఒక ప్రాచీన చిహ్నాన్ని పరిశీలిస్తూ ఇంటెన్స్ లుక్లో కనిపించారు. ఈ పోస్టర్ సినిమాపై ఆసక్తిని పెంచుతోంది. ఈ థ్రిల్లర్ చిత్రంలో నాగ చైతన్య “అర్జున్” అనే నిధి అన్వేషకుడి (Treasure Hunter) పాత్ర పోషిస్తున్నారు.
నిజానికి, ఈ ఫస్ట్ లుక్ పోస్టర్ను సోమవారం (నవంబర్ 3) ఉదయం విడుదల చేయాలని చిత్ర బృందం ముందుగా ప్లాన్ చేసింది. అయితే, సోమవారం తెల్లవారుజామున తెలంగాణలోని చేవెళ్ల వద్ద జరిగిన ఘోర బస్సు ప్రమాదం కారణంగా ఈ నిర్ణయాన్ని వాయిదా వేసుకున్నారు. ఈ దురదృష్టకర సంఘటనలో ముగ్గురు అక్కాచెల్లెళ్లతో సహా పలువురు మరణించిన సంగతి తెలిసిందే. బాధితుల కుటుంబాలకు సంతాపం తెలుపుతూ, వారికి నివాళిగా చిత్ర బృందం ఈ ప్రకటనను మంగళవారానికి (నవంబర్ 4) వాయిదా వేస్తున్నట్లు అధికారికంగా ప్రకటించింది.
‘NC24’ చిత్రాన్ని శ్రీ వెంకటేశ్వర సినీ చిత్ర (SVCC) మరియు సుకుమార్ రైటింగ్స్ బ్యానర్లపై బీవీఎస్ఎన్ ప్రసాద్ నిర్మిస్తున్నారు. ‘విరూపాక్ష’ తరహాలోనే ఇదొక మైథలాజికల్ మిస్టరీ థ్రిల్లర్గా తెరకెక్కుతోంది. ప్రాచీన గ్రంథాలు, అతీంద్రియ శక్తుల (Supernatural Elements) చుట్టూ తిరిగే సాహసోపేతమైన కథాంశంతో ఈ సినిమా ఉండబోతోంది. ఈ చిత్రం షూటింగ్ 2025 ఏప్రిల్లో ప్రారంభమైంది.
