కర్ణాటక రాజకీయాలు మరోసారి హాట్ టాపిక్గా మారాయి. ముఖ్యమంత్రి సిద్ధరామయ్య, ఉప ముఖ్యమంత్రి డి.కె. శివకుమార్ (డీకేఎస్) మధ్య నడుస్తున్న ‘కుర్చీ ఫైట్’ ఇప్పుడు పతాక స్థాయికి చేరింది.
రాష్ట్రంలో కాంగ్రెస్ ప్రభుత్వం ఏర్పడి దాదాపు 2.5 ఏళ్ల గడువు పూర్తి కావడంతో, ముఖ్యమంత్రి పదవి మార్పుపై ఊహాగానాలు మళ్లీ జోరందుకున్నాయి. ఈ వివాదం రోజురోజుకు ముదురుతుండటంతో, కాంగ్రెస్ హైకమాండ్ (CHC) ఎట్టకేలకు రంగంలోకి దిగింది.
బ్రేక్ఫాస్ట్ మీటింగ్కు బలవంతపు ఆదేశం!
నాయకత్వ మార్పుపై ఇద్దరు నేతల క్యాంపులు బహిరంగంగా విమర్శలు చేసుకుంటుండటం, ముఖ్యంగా సోషల్ మీడియాలో పరోక్ష పోస్టులు పెట్టుకోవడం అధిష్టానానికి ఆగ్రహం తెప్పించింది. వెంటనే స్పందించిన AICC ప్రధాన కార్యదర్శి కేసీ వేణుగోపాల్, ఇద్దరు నేతలకు గట్టి వార్నింగ్ ఇచ్చినట్లు సమాచారం. గొడవలు మానుకొని, ఐక్యంగా ఉండాలని ఆదేశించారు.
ఈ నేపథ్యంలోనే, అధిష్టానం ఆదేశాల మేరకు శనివారం ఉదయం ముఖ్యమంత్రి సిద్ధరామయ్య అధికారిక నివాసం ‘కావేరి’లో వీరిద్దరూ అల్పాహార విందుకు హాజరయ్యారు. సిద్ధరామయ్య స్వయంగా డీకేఎస్ను ఆహ్వానించారు. బయటికి పలకరించుకుని, కలిసి అల్పాహారం తీసుకున్నప్పటికీ… లోపల మాత్రం కుర్చీ పోరుపైనే చర్చ జరిగి ఉంటుందని రాజకీయ విశ్లేషకులు చెబుతున్నారు.
అసలు వివాదం ఏంటి?
2023లో కాంగ్రెస్ భారీ విజయం సాధించిన తర్వాత, సీఎం పదవి ఎవరికి ఇవ్వాలనే దానిపై సిద్దూ, డీకేఎస్ మధ్య తీవ్ర పోటీ నెలకొంది. అప్పట్లో సిద్ధరామయ్యకు తొలి 2.5 ఏళ్లు, డీకే శివకుమార్కు తర్వాతి 2.5 ఏళ్లు ముఖ్యమంత్రి పదవి పంచుకోవాలనే ‘రొటేషనల్ సీఎం ఫార్ములా’ తెరపైకి వచ్చింది. ఇది కేవలం మీడియా కథనం కాదని, కొందరు కీలక నేతల సమక్షంలో జరిగిన ‘సీక్రెట్ అండర్స్టాండింగ్’ అని డీకేఎస్ వర్గం బలంగా నమ్ముతోంది.
ప్రభుత్వం సగం కాలం పూర్తి చేసుకున్న వెంటనే, డీకేఎస్ మద్దతుదారులు వెంటనే అధికారాన్ని అప్పగించాలని డిమాండ్ చేస్తూ ఢిల్లీకి వెళ్లి లాబీయింగ్ చేశారు. అయితే, సిద్ధరామయ్య వర్గం మాత్రం అలాంటి లిఖితపూర్వక ఒప్పందం ఏదీ లేదని, ఆయన ఐదేళ్లు ముఖ్యమంత్రిగా ఉంటారని తేల్చి చెబుతోంది. “నా వైఖరిలో ఎలాంటి మార్పు లేదు. హైకమాండ్ ఏం చెబితే దానికి కట్టుబడి ఉంటాను” అని సిద్దరామయ్య ప్రకటించారు. డీకేఎస్ కూడా “నాకు తొందర లేదు, పార్టీ నిర్ణయమే శిరోధార్యం” అని పైకి చెబుతున్నా, పరోక్షంగా మాత్రం ఒత్తిడి పెంచుతున్నారు.
తుది నిర్ణయం ఢిల్లీదే:
ఈ సంక్షోభాన్ని శాశ్వతంగా పరిష్కరించడానికి, కాంగ్రెస్ అధ్యక్షుడు మల్లికార్జున ఖర్గే సహా అగ్ర నాయకత్వం (రాహుల్ గాంధీ, సోనియా గాంధీ) త్వరలోనే సిద్దూ, డీకేఎస్లను ఢిల్లీకి పిలిపించబోతోంది. బ్రేక్ఫాస్ట్ మీటింగ్ ఈ పెద్ద నిర్ణయానికి ముందు ఇద్దరి మధ్య ఉద్రిక్తతను తగ్గించేందుకు చేసిన ప్రయత్నంగా భావించాలి.
కర్ణాటకలో బలమైన ప్రభుత్వాన్ని నిలబెట్టుకోవాల్సిన బాధ్యత కాంగ్రెస్ అధిష్టానంపై ఉంది. ముఖ్యంగా లోక్సభ ఎన్నికల ముందు, ఈ కుర్చీ పంచాయితీని పరిష్కరించకపోతే, అది రాష్ట్రంలో పార్టీకి పెద్ద నష్టం కలిగించే ప్రమాదం ఉంది. అందుకే, పార్టీ అధ్యక్షుడి హోదాలో ఖర్గే ఈ వివాదానికి శాశ్వత పరిష్కారం చూపించేందుకు సిద్ధమవుతున్నారు. వీరిద్దరిలో ఎవరికి ‘మాట’ ఇస్తారు? అసలు 2.5 ఏళ్ల ఒప్పందం ఉంటుందా? అనేదానిపై త్వరలోనే స్పష్టత వచ్చే అవకాశం ఉంది.
