‘బాహుబలి’, ‘ఆర్ఆర్ఆర్’ వంటి చిత్రాలతో భారతీయ సినిమా ఖ్యాతిని ప్రపంచ స్థాయికి తీసుకెళ్లిన ఎస్.ఎస్. రాజమౌళి, ఇప్పుడు సూపర్ స్టార్ మహేష్ బాబుతో కలిసి చేస్తున్న ప్రాజెక్ట్పై అంచనాలు ఆకాశాన్ని తాకాయి. ఈ ‘ఎస్ఎస్ఎంబీ 29’ (వర్కింగ్ టైటిల్) సినిమాకు సంబంధించిన అధికారిక టైటిల్, ఫస్ట్ లుక్ గ్లింప్స్ను నవంబర్ 15న హైదరాబాద్లోని రామోజీ ఫిల్మ్ సిటీలో భారీ ఈవెంట్ ద్వారా విడుదల చేయనున్నారు.
వ్యాపార వ్యూహంలో జక్కన్న మార్కు:
రాజమౌళి కేవలం అద్భుతమైన చిత్రాలు తీయడంలోనే కాదు, వాటి ప్రచార వ్యూహాలను కూడా అత్యంత తెలివిగా, వాణిజ్యపరంగా లాభదాయకంగా మ్లాన్ చేయడంలో దిట్ట. ఈ అడ్వెంచరస్ ఫాంటసీ డ్రామా యొక్క ఫస్ట్ అప్డేట్ ఈవెంట్ను కూడా ఆయన హాలీవుడ్ స్థాయికి ధీటుగా ప్లాన్ చేస్తున్నారు. సినీ వర్గాల సమాచారం ప్రకారం, ఈ కార్యక్రమం కోసం రామోజీ ఫిల్మ్ సిటీలో దాదాపు 20 కోట్ల వ్యయంతో, 100 అడుగుల ఎత్తు ఉన్న భారీ ఎల్ఈడీ టవర్ను నిర్మిస్తున్నారు. ఈ సెట్ నిర్మాణం, ఈవెంట్ ఏర్పాట్లు, గెస్టుల రవాణా, భద్రత, లైవ్ స్ట్రీమింగ్ వంటి మొత్తం ఖర్చు ₹20 కోట్లుగా అంచనా వేస్తున్నారు.
అయితే, ఈ ఖర్చును కూడా రాజమౌళి బృందం తెలివిగా లాభాలుగా మార్చుకుంది. ఈ భారీ ఈవెంట్ను ప్రత్యక్ష ప్రసారం (Live Stream) చేసే హక్కులను ప్రముఖ ఓటీటీ సంస్థ జియో హాట్స్టార్కు విక్రయించినట్లు తెలుస్తోంది. ఈ హక్కుల కోసం జియో హాట్స్టార్ సుమారు ₹50 కోట్ల భారీ మొత్తాన్ని చెల్లించినట్లు సమాచారం. ఈ డీల్ ద్వారా, ఈ సినిమా ప్రచార కార్యకలాపాలు ప్రారంభం కాకముందే, కేవలం ఒక ఈవెంట్ ద్వారానే నిర్మాతలు 30 కోట్ల వరకు లాభం ఆర్జించినట్టు అవుతుంది. ఇది రాజమౌళి యొక్క తిరుగులేని వాణిజ్య వ్యూహం అని చెప్పవచ్చు.
నవంబర్ 15న జరగనున్న ఈ ఈవెంట్కు మహేష్ బాబుతో పాటు, ఈ చిత్రంలో భాగం కానున్నట్లు భావిస్తున్న నటీనటులు ప్రియాంక చోప్రా జోనస్, పృథ్వీరాజ్ సుకుమారన్తో పాటు ఆస్కార్ విజేత సంగీత దర్శకుడు ఎం.ఎం. కీరవాణి కూడా హాజరయ్యే అవకాశం ఉంది. ఈ కార్యక్రమానికి లక్ష మందికి పైగా అభిమానులు హాజరవుతారని అంచనా వేస్తున్నారు. జియో హాట్స్టార్ ఈ ఈవెంట్ను లైవ్ స్ట్రీమ్ చేయడం ద్వారా, తొలి అప్డేట్ ప్రపంచవ్యాప్తంగా ఉన్న కోట్లాది మంది ప్రేక్షకులకు చేరనుంది. ఈ సినిమాకు ‘వారణాసి’ అనే టైటిల్ను పరిశీలిస్తున్నట్లు కూడా వార్తలు వినిపిస్తున్నాయి.
రాజమౌళి ప్రతి సినిమాకు పెట్టిన ప్రతి రూపాయికి రెట్టింపు లాభాన్ని ఆర్జించేలా వ్యూహాలు రచిస్తారు. ఈ ‘ఎస్ఎస్ఎంబీ 29’ ఈవెంట్ కూడా ఆ సినిమా స్థాయిని, రాజమౌళి బ్రాండ్ను మరోసారి నిరూపించబోతోందని సినీ విశ్లేషకులు చెబుతున్నారు.
