ఓటీటీ ప్రపంచంలో సస్పెన్స్, హారర్ థ్రిల్లర్ జోనర్ చిత్రాలకు ఎప్పుడూ మంచి ఆదరణ ఉంటుంది. ఆ కోవకు చెందిన ఒక విభిన్నమైన చిత్రమే ‘చిత్రం కాదు నిజం’. ఈ సినిమా దక్షిణ భారత చిత్ర పరిశ్రమలో ఒక కొత్త ప్రయోగం. ఇది ‘ఫౌండ్ ఫుటేజ్’ (దొరికిన వీడియో) శైలిలో తెరకెక్కిన హారర్ చిత్రం.

ఈ సినిమా కథ చాలా భయానకంగా ఉంటుంది. కొంతమంది స్నేహితుల బృందం పశ్చిమ కనుమలలోని దట్టమైన అడవుల్లోకి ట్రెకింగ్‌కు వెళతారు. అయితే, వారందరూ అక్కడ అదృశ్యమవుతారు.

కొంతకాలం తర్వాత, ఆ బృందానికి చెందిన ఒక వీడియో కెమెరా ఆ అడవిలో దొరుకుతుంది. ఆ కెమెరాలో రికార్డ్ అయిన భయంకరమైన దృశ్యాలనే సినిమాగా చూపించారు. వారి ప్రయాణం, వారు ఎదుర్కొన్న భయానక సంఘటనలు ఇందులో రికార్డ్ అయ్యాయి. నిజానికి ఈ చిత్రం 2014లో కన్నడలో ‘6-5=2’ పేరుతో విడుదలైంది. అక్కడ ఈ సినిమా సంచలనాత్మక బ్లాక్‌బస్టర్‌గా నిలిచింది.

ఆ సమయంలో ‘ఫౌండ్ ఫుటేజ్’ కాన్సెప్ట్ ప్రేక్షకులకు చాలా కొత్తగా అనిపించింది. అంతేకాకుండా, ఇది నిజంగా దొరికిన ఫుటేజ్ ఆధారంగా తీసిన సినిమా అని ప్రచారం చేయడంతో, సినిమా చూసిన చాలా మంది ఇది నిజమేనని నమ్మి భయపడ్డారు.ఆ తర్వాత ఈ చిత్రాన్ని తెలుగులో ‘చిత్రం కాదు నిజం’ పేరుతో డబ్ చేశారు. ఇక్కడ కూడా మంచి విజయం సాధించింది.

సమాచారం ప్రకారం, ఈ సినిమా 1999లో కర్ణాటకలోని చిక్కమగళూరు జిల్లాలో జరిగిన ఒక నిజ సంఘటన ఆధారంగా తెరకెక్కింది. అప్పట్లో ఏడుగురు స్నేహితులు ట్రెకింగ్‌కు వెళ్లి అడవిలో అదృశ్యం కావడం సంచలనం రేపింది. ఆ కథే ఈ సినిమాకు స్ఫూర్తి.

ఈ సినిమాలో నటీనటులందరూ కొత్తవారే కావడం వలన, ఇది వాస్తవికతకు చాలా దగ్గరగా ఉంటుంది.ఈ భయానకమైన థ్రిల్లర్‌ను థియేటర్లలో మిస్ అయిన వారు లేదా మళ్లీ చూడాలనుకునే వారికి ఒక శుభవార్త. ‘చిత్రం కాదు నిజం’ ఇప్పుడు ప్రముఖ ఓటీటీ ప్లాట్‌ఫామ్‌లలో అందుబాటులో ఉంది.

ఈ చిత్రం జియో హాట్‌స్టార్ సబ్‌స్క్రైబర్లకు అందుబాటులో ఉంది. అంతేకాకుండా, ఈ పూర్తి సినిమా యూట్యూబ్‌లో కూడా ఉచితంగా అందుబాటులో ఉండటం విశేషం.