‘ఉప్పెన’ సినిమాతో సంచలన విజయం సాధించి, జాతీయ అవార్డును కూడా అందుకున్నాడు దర్శకుడు బుచ్చిబాబు సానా. మొదటి సినిమాతోనే ఇండస్ట్రీలో తనకంటూ ఒక ప్రత్యేక ముద్ర వేసుకున్నాడు. ప్రస్తుతం ఆయన మెగా పవర్ స్టార్ రామ్ చరణ్తో ‘పెద్ది’ (RC16) అనే పాన్-ఇండియా చిత్రాన్ని తెరకెక్కిస్తున్నాడు. ఈ సినిమాలో జాన్వీ కపూర్ హీరోయిన్గా నటిస్తోంది.
అయితే, ‘పెద్ది’ సినిమా షూటింగ్ చివరి దశలో ఉండగానే, బుచ్చిబాబు మూడో సినిమా గురించి ఒక షాకింగ్ న్యూస్ ఇండస్ట్రీ వర్గాల్లో చక్కర్లు కొడుతోంది. ఈసారి ఏకంగా బాలీవుడ్ కింగ్ ఖాన్ షారుఖ్తో బుచ్చిబాబు సినిమా చేయబోతున్నాడని టాక్. ఈ వార్త టాలీవుడ్ మరియు బాలీవుడ్ వర్గాలను ఆశ్చర్యపరుస్తోంది.
టాలీవుడ్ అగ్ర నిర్మాణ సంస్థ మైత్రీ మూవీ మేకర్స్ ఈ ప్రాజెక్ట్ను నిర్మించడానికి సిద్ధమైనట్లు తెలుస్తోంది. ఇప్పటికే మైత్రీ సంస్థ తెలుగుతో పాటు తమిళం, హిందీ భాషల్లోకి కూడా అడుగుపెట్టింది. ఇప్పుడు షారుఖ్ ఖాన్తో ఒక భారీ పాన్-ఇండియా ప్రాజెక్ట్ ప్లాన్ చేస్తోంది.
నివేదికల ప్రకారం, ఈ చిత్రం కోసం మైత్రీ మూవీ మేకర్స్ ఏకంగా రూ. 500 కోట్ల భారీ బడ్జెట్ను కేటాయించినట్లు సమాచారం. ఇటీవల మైత్రీ ప్రతినిధులు ముంబైలో షారుఖ్ ఖాన్ను కలిసి, ఆయనకు అడ్వాన్స్ కూడా చెల్లించినట్లు ప్రచారం జరుగుతోంది.
కొన్ని వర్గాల సమాచారం ప్రకారం, ఇది ఒక “కల్చరల్లీ రూటెడ్ ఎమోషనల్ మాస్ ఎంటర్టైనర్” అని తెలుస్తోంది. ఇందులో షారుఖ్ ఖాన్ తన వయసుకు తగ్గ పాత్రలో, ఎన్నో కష్టాలను ఎదుర్కొన్న వ్యక్తిగా కనిపిస్తారట. ‘ఉప్పెన’ లాంటి ఎమోషనల్ బ్లాక్బస్టర్ ఇచ్చిన బుచ్చిబాబు, షారుఖ్ను ఎలా చూపిస్తాడనేది ఆసక్తికరంగా మారింది.
ప్రస్తుతం బుచ్చిబాబు ‘పెద్ది’ సినిమా పనుల్లో బిజీగా ఉన్నారు. ఆ ప్రాజెక్ట్ పూర్తయిన వెంటనే, షారుఖ్ ఖాన్ సినిమాకు సంబంధించిన అధికారిక ప్రకటన వెలువడే అవకాశం ఉంది.
