విజయవాడ: “గోరు చుట్టుపై రోకటి పోటు” అంటే ఇదేనేమో! అడవిలో ఆపరేషన్ కగార్ సెగ తట్టుకోలేక సిటీకి వస్తే.. ఇక్కడ చేసిన చిన్న తప్పు మావోయిస్టుల కొంపముంచింది. విజయవాడ నడిబొడ్డున, అదీ ఆటోనగర్ (Autonagar) లాంటి రద్దీ ప్రాంతంలో ఏకంగా 27 మంది మావోయిస్టులను పోలీసులు అరెస్ట్ చేయడం ఇప్పుడు రాష్ట్రవ్యాప్తంగా సంచలనంగా మారింది.
అసలేం జరిగిందంటే.. ఇటీవల అల్లూరి సీతారామరాజు జిల్లా, మారేడుమిల్లి అటవీ ప్రాంతంలో జరిగిన భారీ ఎన్కౌంటర్లలో (Maredumilli Encounter) 13 మందికి పైగా మావోయిస్టులు ప్రాణాలు కోల్పోయారు. అగ్రనేతలు కూడా నేలకొరగడంతో, ప్రాణభయంతో మిగిలిన దళ సభ్యులు మైదాన ప్రాంతాలకు పరుగులు తీశారు. సేఫ్ షెల్టర్ కోసం విజయవాడను ఎంచుకున్నారు.
అయితే, మావోయిస్టులు తమ ఉనికిని దాచడానికి చేసిన అతి తెలివి పనే వారిని పట్టించింది. ఆటోనగర్ శివారులో ఓ భారీ భవనంలోని ఖాళీ హాల్ను అద్దెకు తీసుకున్నారు. మామూలుగా అయితే ఎవరైనా అనుమానం రాకుండా చిన్న చిన్న గదులు తీసుకుంటారు. కానీ వీరు ఏకంగా నెలకు రూ. 1 లక్ష అద్దె చెల్లించేలా ఒప్పందం కుదుర్చుకున్నారట!
“అతి రహస్యం బట్టబయలు” అన్నట్లు.. నిర్మానుష్యంగా ఉండే ఆ హాల్కి అంత అద్దె ఎవరు ఇస్తున్నారు? అసలు అందులో ఏం జరుగుతోంది? అని స్థానికులకు, ఆటో కార్మికులకు అనుమానం వచ్చింది. ఈ విషయం ఆ నోటా ఈ నోటా పాకి పోలీసుల చెవిన పడింది. వెంటనే రంగంలోకి దిగిన పోలీసులు, పక్కా ప్లాన్తో ఆ భవనాన్ని చుట్టుముట్టారు. లోపల ఉన్న 27 మందిని అదుపులోకి తీసుకున్నారు. ఇంటెలిజెన్స్ సమాచారం ఒక ఎత్తైతే, ఈ ‘హై-కాస్ట్ రెంటల్ డీల్’ పోలీసుల పనిని మరింత సులువు చేసిందని టాక్. పాపం.. లక్షలు పోసి షెల్టర్ తీసుకుంటే, చివరకు అదే జైలు దారి చూపించింది!
