‘బేబీ’తో అటు ఆనంద్ దేవరకొండ, ఇటు వైష్ణవి చైతన్య స్టార్డమ్ను అమాంతం పెంచుకున్నారు. క్లాస్, మాస్, యూత్..ఇలా అన్ని వర్గాల ఆడియెన్స్ను ఆకట్టుకున్నారు.
అందుకే, ఈ జోడీ కాంబినేషన్ గురించి ఇండస్ట్రీలో ఎప్పటి నుంచో చర్చ నడుస్తోంది. తాజాగా ఆ అంచనాలను అందుకుంటూ సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ సంయుక్త నిర్మాణంలో వీరి కొత్త చిత్రం ‘ఎపిక్’ (Epic) టైటిల్ను, గ్లింప్స్ను రిలీజ్ చేశారు.
ఈ ‘ఎపిక్’ గ్లింప్స్ ప్రస్తుతం సోషల్ మీడియాలో ట్రెండింగ్లో ఉంది. దీనికి ప్రధాన కారణం దర్శకుడు ఎంచుకున్న పాయింట్. ఈ సినిమాకు ‘#90స్ ఏ మిడిల్ క్లాస్ బయోపిక్’ వెబ్ సిరీస్తో పేరు తెచ్చుకున్న యంగ్ డైరెక్టర్ ఆదిత్య హాసన్ దర్శకత్వం వహిస్తున్నారు. ఇది ఆయనకు మొదటి సినిమా కావడం విశేషం.
గ్లింప్స్లో హీరో ఆనంద్ దేవరకొండ చెప్పే ఒక డైలాగ్ అందరి దృష్టిని ఆకర్షించింది. ‘ఇది శేఖర్ కమ్ముల సినిమాల్లో హీరోలాంటి అబ్బాయికి, సందీప్ రెడ్డి వంగా సినిమాల్లో హీరోలాంటి అమ్మాయికి మధ్య జరిగే ప్రేమకథ’ అని ఆనంద్ అంటాడు. ఈ ఒక్క డైలాగ్తోనే సినిమా స్టోరీ లైన్ ఎలాంటి కాంట్రాస్ట్లో ఉండబోతుందో క్లారిటీ ఇచ్చారు. ఒకవైపు క్లాసిక్, సున్నితమైన ప్రేమను కోరుకునే అబ్బాయి; మరోవైపు ప్రాక్టికల్గా, కొంచెం దూకుడుగా ఉండే అమ్మాయి మధ్య జరిగే లవ్ వార్ను చూడబోతున్నామన్నమాట.
హీరోయిన్ వైష్ణవి చైతన్య డైలాగ్లు కూడా అదే విషయాన్ని ధృవీకరిస్తున్నాయి. ‘నాకైతే పెళ్లి ఇష్టం లేదు.. కానీ పేరెంట్స్ కోసం అయితే తప్పదు’ అంటూ నేటితరం అమ్మాయిల మనస్తత్వాన్ని ప్రతిబింబించింది. తనకు కాబోయే వరుడు ఎలా ఉండాలో వైష్ణవి చెప్పే సంభాషణలు ఆకట్టుకున్నాయి. ఈ డైలాగ్లు, నేపథ్య సన్నివేశాలు చూస్తుంటే.. ఈ ‘ఎపిక్’ చిత్రం పూర్తిస్థాయి మిడిల్ క్లాస్ లవ్ స్టోరీగా తెరకెక్కుతోందని అర్థమవుతోంది.
బ్లాక్ బస్టర్ ‘బేబీ’ తర్వాత ఈ జోడీ మళ్లీ రిపీట్ కావడంతో అంచనాలు ఆకాశాన్ని తాకుతున్నాయి. ముఖ్యంగా, ‘ఎపిక్’ సినిమాను ఏకంగా సితార ఎంటర్టైన్మెంట్స్ లాంటి భారీ నిర్మాణ సంస్థ నిర్మిస్తుండటం హైలైట్. ప్రముఖ నిర్మాతలు సూర్యదేవర నాగవంశీ, సాయి సౌజన్య ఈ ప్రతిష్టాత్మక ప్రాజెక్ట్ను నిర్మిస్తున్నారు.
టెక్నికల్ టీమ్ విషయానికి వస్తే.. మ్యూజిక్ సెన్సేషన్ హేషం అబ్దుల్ వహాబ్ సంగీతం అందిస్తుండగా, నేషనల్ అవార్డ్ విన్నర్ నవీన్ నూలి ఎడిటింగ్ బాధ్యతలు చూసుకుంటున్నారు. అజీమ్ మొహమ్మద్ సినిమాటోగ్రఫీ అందించారు. ఇంత బలమైన టెక్నికల్ టీమ్ ఒక డెబ్యూ డైరెక్టర్కు దొరకడం అంటే.. కథపై నిర్మాతలకు ఎంత నమ్మకం ఉందో తెలుస్తోంది. మొత్తానికి, యూత్కు కనెక్ట్ అయ్యే ఈ ప్రేమకథ బాక్సాఫీస్ వద్ద కూడా ‘ఎపిక్’ సక్సెస్ సాధిస్తుందని సినీ వర్గాలు అంచనా వేస్తున్నాయి.
