ప్రపంచ సినిమా మార్కెట్‌లో హాలీవుడ్ యానిమేషన్ సినిమా ‘జూటోపియా 2’ పెను సంచలనం సృష్టించింది. అసలు విదేశీ సినిమాలకు అంతగా పట్టం కట్టని చైనాలోనే ఈ సినిమా అరాచకం చేసింది. విడుదలైన కొద్ది రోజుల్లోనే ప్రపంచవ్యాప్తంగా ఏకంగా $556 మిలియన్ల (సుమారు ₹4,635 కోట్లు) భారీ ఓపెనింగ్‌ను సాధించి, చరిత్ర సృష్టించింది. యానిమేషన్ సినిమాల చరిత్రలోనే ఇంత భారీ గ్లోబల్ ఓపెనింగ్ సాధించిన మొదటి సినిమా ఇదే!

ఇదంతా ఒకెత్తయితే, ఈ సినిమా చైనా బాక్సాఫీస్ వద్ద చూపించిన ప్రభంజనం మరో ఎత్తు. సాధారణంగా చైనాలో స్థానిక సినిమాలే ఎక్కువ వసూలు చేస్తుంటాయి. హాలీవుడ్ సినిమాలు అక్కడ పట్టు సాధించడం ఇటీవలి కాలంలో కష్టమైంది. కానీ, ‘జూటోపియా 2’ ఆ అంచనాలను, ఆ ట్రెండ్‌ను పూర్తిగా తిరగరాసింది.

కేవలం ఐదు రోజుల్లోనే చైనా మార్కెట్‌లో $272 మిలియన్లు (దాదాపు ₹2,270 కోట్లు) కలెక్ట్ చేసింది. మొదటి జూటోపియా (2016) సినిమా చైనాలో లైఫ్‌టైమ్ కలెక్షన్ $236 మిలియన్లు. అంటే, దానికి దాదాపు $36 మిలియన్లు అదనంగా, కేవలం ఐదు రోజుల్లోనే సీక్వెల్ వసూలు చేసిందన్న మాట. పాత సినిమాపై ప్రేక్షకులకు ఉన్న ప్రేమ, నాస్టాల్జియా ఎంత బలంగా ఉందో ఈ వసూళ్లే చెబుతున్నాయి.

ఎండ్‌గేమ్ రికార్డు బ్రేక్.!

ఈ సినిమా సాధించిన అతి పెద్ద రికార్డు ఏమిటంటే… చైనాలో ఒక్క రోజులో అత్యధిక వసూళ్లు రాబట్టిన హాలీవుడ్ సినిమాగా నిలవడం.

విడుదలైన నాలుగో రోజు (శనివారం) నాడు ‘జూటోపియా 2’ $104.8 మిలియన్ల భారీ వసూళ్లను (సుమారు ₹875 కోట్లు) సాధించింది. అంతకుముందు ఆ రికార్డు ‘అవెంజర్స్: ఎండ్‌గేమ్’ (2019) పేరిట ఉండేది. ‘ఎండ్‌గేమ్’ ఒకే రోజులో $97.5 మిలియన్లు వసూలు చేసింది. ఇప్పుడు ఆ రికార్డును ‘జూటోపియా 2’ బ్రేక్ చేసింది. యానిమేషన్ సినిమాకు ఇంతటి వసూళ్లు రావడం చూసి ప్రపంచ సినీ విశ్లేషకులందరూ ఆశ్చర్యపోయారు.

ఈ సినిమా బడ్జెట్ $150 మిలియన్లు కాగా, ఇది ఓపెనింగ్ వీకెండ్‌లోనే ప్రపంచవ్యాప్తంగా మూడు రెట్లు ఎక్కువగా వసూలు చేసింది. జూడీ హాప్స్, నిక్ వైల్డ్‌ల డిటెక్టివ్ జంట కథ, మంచి సందేశం, హై-క్వాలిటీ యానిమేషన్ ప్రేక్షకులను మళ్లీ థియేటర్లకు రప్పించాయి.

చైనాలో ఇటీవల దేశీయ చిత్రాల హవా కొనసాగుతున్నా, ‘జూటోపియా 2’ అందించిన ఈ ఘన విజయం, మంచి కంటెంట్ ఉంటే హాలీవుడ్ సినిమాలు కూడా సత్తా చాటగలవని నిరూపించింది. అంతేకాదు, భవిష్యత్తులో డిస్నీ నుండి, ఇతర హాలీవుడ్ స్టూడియోల నుండి మరిన్ని యానిమేషన్ సినిమాలు చైనా మార్కెట్లోకి వెళ్లడానికి ఈ రికార్డు ప్రేరణనిస్తుంది అనడంలో సందేహం లేదు. మొత్తానికి, హాలీవుడ్ పవర్ ఏంటో ‘జూటోపియా 2’ చైనాకు గట్టిగా గుర్తుచేసింది.