సూపర్ స్టార్ రజనీకాంత్ తదుపరి సినిమా ‘తలైవా 173’ గురించి కోలీవుడ్లో కొత్త చర్చ మొదలైంది. లెజెండరీ యాక్టర్ కమల్ హాసన్ నిర్మాణ సంస్థ ‘రాజ్ కమల్ ఫిల్మ్స్ ఇంటర్నేషనల్’ (RKFI) ఈ ప్రతిష్టాత్మక ప్రాజెక్టును నిర్మిస్తోంది. అయితే, ఈ సినిమాకు దర్శకుడు ఎవరనే విషయంలో చాలా కాలంగా సస్పెన్స్ కొనసాగింది.
ముందుగా ఈ ప్రాజెక్ట్ను దర్శకుడు సుందర్.సీ ప్రకటించారు. కానీ, అనుకోని కారణాల వల్ల ఆయన ఈ సినిమా నుంచి తప్పుకున్నారు. సుందర్.సీ చెప్పిన హారర్-కామెడీ కథ రజనీకాంత్కు అంతగా నచ్చకపోవడంతోనే ఈ మార్పు వచ్చిందని పరిశ్రమలో వినిపించింది. దాంతో, కమల్ హాసన్.. “స్టార్కు నచ్చేవరకు కథల వేట కొనసాగుతుంది” అని స్పష్టం చేశారు.
తాజా సమాచారం ప్రకారం, ‘తలైవా 173’ పగ్గాలు యువ దర్శకుడు రామ్కుమార్ బాలకృష్ణన్ చేతికి వెళ్లినట్లు తెలుస్తోంది. గతంలో విమర్శకుల ప్రశంసలు అందుకున్న ‘పార్కింగ్’ (Parking) సినిమాతో రామ్కుమార్ మంచి గుర్తింపు తెచ్చుకున్నారు. ఈయన చెప్పిన కాలేజ్ బ్యాక్డ్రాప్ స్టోరీ రజనీకాంత్, కమల్కు బాగా నచ్చిందట. గ్రీన్ సిగ్నల్ కూడా ఇచ్చేసినట్లు ఇండస్ట్రీ వర్గాల సమాచారం.
నిజానికి, ‘మహారాజా’ ఫేమ్ నిథిలన్ స్వామినాథన్ పేరు కూడా ఈ రేసులో ఉంది. కానీ, రామ్కుమార్ చెప్పిన కథ కొంచెం కమర్షియల్గా ఉండటం, తలైవా ఇమేజ్కు సరిగ్గా సరిపోతుందని భావించడంతో.. దర్శకద్వయం ఆయన వైపే మొగ్గు చూపినట్లు వార్తలు వస్తున్నాయి. మొత్తానికి, సూపర్ స్టార్ సినిమా ఛాన్స్ ఈ యంగ్ డైరెక్టర్కు దక్కేలా ఉంది.
ప్రస్తుతం రజనీకాంత్.. నెల్సన్ దిలీప్కుమార్ దర్శకత్వంలో రాబోతున్న ‘జైలర్ 2’ పనుల్లో బిజీగా ఉన్నారు. ఈ నేపథ్యంలో, ‘తలైవా 173’ షూటింగ్ వచ్చే ఏడాది మార్చిలో ప్రారంభం కావచ్చని తెలుస్తోంది. అంతేకాదు, ఈ నెల 12వ తేదీన రజనీకాంత్ పుట్టినరోజు సందర్భంగా, ఈ ప్రాజెక్ట్ గురించిన అధికారిక ప్రకటన వచ్చే అవకాశం ఉంది.
రజనీకాంత్, కమల్ హాసన్ దాదాపు నాలుగు దశాబ్దాల తర్వాత ఈ సినిమాతో నిర్మాత-నటుడిగా కలిసి పనిచేస్తున్నారు. వారిద్దరూ కలిసి తెరపై కనిపించే మల్టీస్టారర్ కంటే ముందే, కమల్ నిర్మాణంలో రజనీ సినిమా వస్తుండటం అభిమానుల్లో భారీ అంచనాలు పెంచింది. ఈ ‘అనెక్స్పెక్టెడ్’ కాంబోకు సంబంధించిన పూర్తి వివరాల కోసం అభిమానులు ఆసక్తిగా ఎదురు చూస్తున్నారు.
