హైదరాబాద్: సాధారణంగా “బాబు.. మీ ఆధార్ అప్డేట్ చేసుకోండి, లేకపోతే బ్యాంక్ అకౌంట్ బంద్ అవుతుంది” అంటే పల్లెటూరి జనం భయపడతారు. కానీ, ఇక్కడ సీన్ రివర్స్. సాక్షాత్తూ రాష్ట్ర మంత్రులు, జర్నలిస్టుల గ్రూపుల్లో ఈ ఎస్బీఐ కేవైసీ (SBI KYC) లింకులు చక్కర్లు కొట్టాయి. “అయ్యో.. అప్డేట్ చేయకపోతే ఎలా?” అని ఎవరో ఒక్కరు ఆ ఏపీకే (APK) ఫైల్ మీద వేలు వేశారో లేదో.. అంతే సంగతులు! క్షణాల్లో గ్రూపులన్నీ హ్యాకర్ల చేతిలోకి వెళ్లిపోయాయి.
ముఖ్యమంత్రి కార్యాలయం (CMO), ఉప ముఖ్యమంత్రి (Deputy CM) పేషీలకు సంబంధించిన మీడియా గ్రూపులు కూడా హ్యాక్ అయినట్లు టాక్. వాట్సాప్ గ్రూపు పేర్లను కూడా మార్చేసి, “స్టేట్ బ్యాంక్ ఆఫ్ ఇండియా” అని బోర్డు పెట్టేశారు ఈ సైబర్ కేటుగాళ్లు. దీంతో గ్రూపుల్లో ఉన్న జర్నలిస్టులు, అధికారులు తలలు పట్టుకుంటున్నారు.
“చేతులు కాలాక ఆకులు పట్టుకున్నట్టు”.. ఇప్పుడు సైబర్ క్రైమ్ పోలీసులు హడావుడిగా రంగంలోకి దిగారు. దయచేసి ఎవరూ ఆ APK ఫైళ్లను ఓపెన్ చేయొద్దని, ఆ లింకులను క్లిక్ చేయొద్దని హెచ్చరిస్తున్నారు. మంత్రులకే రక్షణ లేకపోతే, ఇక సామాన్యుడి పరిస్థితి ఏంటని సోషల్ మీడియాలో నెటిజన్లు సెటైర్లు వేస్తున్నారు. ఏది ఏమైనా, స్మార్ట్ ఫోన్ చేతిలో ఉంది కదా అని ఏది పడితే అది నొక్కితే.. మొదటికే మోసం వస్తుంది సుమీ!
జాగ్రత్త సుమా.. గ్రూపులో మెసేజ్ వచ్చింది కదా అని గుడ్డిగా నమ్మకండి. అధికారిక వెబ్ సైట్లను మాత్రమే నమ్మండి.
