టాలీవుడ్లో దశాబ్దాలుగా మెగాస్టార్గా వెలుగొందుతున్న చిరంజీవి పేరును ఉపయోగించి కొందరు అసాంఘిక కార్యకలాపాలకు పాల్పడుతున్నారనే ఆరోపణలు ఇటీవల ఆయన దృష్టికి వచ్చాయి. దీంతో మెగాస్టార్ తన పేరు, ప్రతిష్టలను అనధికారికంగా, అక్రమంగా వాడుకుంటున్న వారిపై చర్యలు తీసుకోవాలని తన లీగల్ టీమ్ను ఆదేశించారు. ఈ నేపథ్యంలో, చిరంజీవి టీమ్ పలువురికి లీగల్ నోటీసులు పంపింది.
ఈ నోటీసులు అందుకున్న వారిలో నల్లగండ్లలో ‘స్ట్రీట్ బైట్ రవి’ అనే వ్యక్తి ‘చిరంజీవి’ పేరుతో రెస్టారెంట్ నడుపుతున్న యజమాని కూడా ఉన్నారు. లీగల్ నోటీసు రావడంతో ఆందోళన చెందిన రెస్టారెంట్ యజమాని రవి, వెంటనే చిరంజీవి టీమ్ను సంప్రదించారు.
రవి చిరంజీవి టీమ్కు తాను మెగాస్టార్కు వీరాభిమానిని అని వివరించారు. కేవలం తన అభిమానాన్ని చాటుకోవాలనే ఉద్దేశంతో మాత్రమే రెస్టారెంట్కు చిరంజీవి పేరు పెట్టానని, ఎలాంటి అక్రమ లేదా చట్టవిరుద్ధ కార్యకలాపాలు నిర్వహించడం లేదని స్పష్టం చేశారు. అంతేకాకుండా, రెస్టారెంట్లో అడుగడుగునా చిరంజీవికి సంబంధించిన ఫోటోలు, పోస్టర్లను ఏర్పాటు చేసి, ఆయన పట్ల ఉన్న గౌరవాన్ని చాటుకున్నారు. తమ రెస్టారెంట్లో వినియోగదారులకు నాణ్యమైన ఆహారాన్ని అందిస్తున్నామని, చిరంజీవి పేరుకు ఎటువంటి చెడ్డ పేరు రాకుండా జాగ్రత్త పడుతున్నామని రవి పేర్కొన్నారు.
రవి వివరణతో పాటు, చిరంజీవి టీమ్ ఆ రెస్టారెంట్ను స్వయంగా సందర్శించి పరిశీలించింది. రెస్టారెంట్ వాతావరణం, నిర్వహణ పూర్తిగా చిరంజీవిపై ఉన్న అభిమానంతోనే కొనసాగుతున్నాయని, ఎటువంటి ఇల్లీగల్ యాక్టివిటీస్ జరగడం లేదని వారు ధృవీకరించారు.
ఫ్యాన్స్ చూపిన అభిమానాన్ని గుర్తించి, వారి ఉద్దేశాన్ని అర్థం చేసుకున్న మెగాస్టార్ చిరంజీవి, ఆ రెస్టారెంట్ యజమానిపై దయ చూపారు. ఆ వ్యక్తి కేవలం అభిమానంతోనే రెస్టారెంట్ నడుపుతున్నాడని తెలుసుకున్న తర్వాత, పంపిన లీగల్ నోటీసును ఉపసంహరించుకోవాలని తన టీమ్ను ఆదేశించారు. ఈ ఆమోదంతో రవి యథావిధిగా చిరంజీవి పేరుతో తన రెస్టారెంట్ను సంతోషంగా కొనసాగించుకోవడానికి గ్రీన్ సిగ్నల్ లభించింది.
చిరంజీవి తీసుకున్న ఈ నిర్ణయం ఆయన అభిమానుల్లో మరింత ఉత్సాహాన్ని నింపింది. చిరంజీవిని కేవలం ఒక నటుడిగానే కాకుండా, కష్టపడి పైకి ఎదిగిన స్ఫూర్తిగా చూసే కోట్ల మంది అభిమానులు ఉన్నారని, ఆయన పేరు ఎప్పటికీ ఒక సానుకూల శక్తిగానే ఉంటుందని మెగా అభిమానులు హర్షం వ్యక్తం చేశారు.
