టాలీవుడ్ మరియు కోలీవుడ్ సినీ రంగంలో ప్రకంపనలు సృష్టిస్తున్న సంచలన వార్త ఇది. స్టార్ హీరోయిన్ సమంత రూత్ ప్రభు త్వరలోనే రెండో పెళ్లి పీటలు ఎక్కబోతున్నట్టుగా ఎక్స్‌క్లూజివ్ సమాచారం వెలువడింది. విశ్వసనీయ వర్గాల నుండి అందిన వివరాల ప్రకారం, సమంత తన రెండో పెళ్లిని డిసెంబర్ 1వ తారీఖున జరుపుకోబోతున్నారు.

పెళ్లి ఎక్కడ, ఎవరితో?

ఈ పెళ్లి వేడుక ఎక్కడో లగ్జరీ హోటల్‌లో కాకుండా, పూర్తిగా ఆధ్యాత్మిక వాతావరణంలో జరగనుంది. కోయంబత్తూరులో ఉన్న సద్గురు ఈషా ఫౌండేషన్ (Isha Foundation, Coimbatore) ఆశ్రమంలో ఈ వివాహం జరగనుంది. ఆశ్రమం అంటే సామ్‌కు ఎంత ఇష్టమో గతంలో ఆమె పలుమార్లు చెప్పిన విషయం తెలిసిందే. ఆశ్రమాన్ని ‘హోమ్ అవే ఫ్రమ్ హోమ్’ అని ఆమె తరచూ అభివర్ణిస్తుంటారు.

సమంత వివాహం చేసుకోబోతున్న వ్యక్తి పేరు రాజ్ నిడుమూరు. ఫ్యామిలిమెన్ వెబ్ సిరీస్ దర్శక ద్వయం రాజ్ & డీకే లో ఒకరైన రాజ్ నిడుమోరు సమంత తో పీకల్లోతు ప్రేమలో ఉన్నారని ఆల్రెడీ పుకార్లు ఉన్నాయి.వీటన్నిటికి డిసెంబర్ 1న అన్నిటికీ సమాధానాలు దొరకనున్నాయి.

ఈ పెళ్లిని అత్యంత గోప్యంగా, కేవలం అతి కొద్ది మంది సన్నిహితుల సమక్షంలో మాత్రమే నిర్వహించడానికి ఏర్పాట్లు జరుగుతున్నాయట. దీనిని బట్టి చూస్తే, సామ్ ఈసారి తన వ్యక్తిగత జీవితాన్ని ప్రైవేట్‌గా ఉంచుకోవడానికి ఎంత ప్రయత్నిస్తున్నారో అర్థమవుతోంది.

ఆధ్యాత్మిక ప్రయాణం, ఆ తర్వాతే పెళ్లి నిర్ణయం:

నాగ చైతన్యతో విడాకుల తర్వాత, సమంత పూర్తిగా తన కెరీర్ మరియు ఆరోగ్య సమస్య (మయోసైటిస్)లపై దృష్టి పెట్టారు. ఈ కష్ట సమయంలో ఆమెకు సద్గురు బోధనలు, ఆశ్రమం ఎంతో ఆత్మస్థైర్యాన్ని ఇచ్చాయి. తరచూ ఆశ్రమానికి వెళ్లి యోగా, ధ్యానం చేస్తూ ప్రశాంతతను వెతుక్కున్నారు.

కొన్నాళ్లు ఆధ్యాత్మిక ప్రయాణంలో గడిపిన సమంత, మళ్లీ సినిమాలు, వెబ్ సిరీస్‌లతో బిజీగా ఉన్నారు. ఈ మధ్యే ఆమె కొత్త బ్రాండ్ ‘ట్రూలీ స్మా (Truly Sma)’ను కూడా ప్రారంభించారు. కెరీర్ మళ్లీ గాడిన పడుతున్న సమయంలో, వ్యక్తిగత జీవితంలో కూడా ఒక తోడు అవసరమని భావించి ఈ నిర్ణయం తీసుకున్నట్టు ఫిల్మ్ నగర్ టాక్.

గోప్యత ఎందుకంటే?

సామ్‌కు గతంలో జరిగిన వివాహం, ఆ తర్వాత విడాకుల వ్యవహారం మీడియాలో పెద్ద దుమారం రేపింది. ఈసారి ఎలాంటి అనవసరపు వివాదాలు, మీడియా దృష్టి లేకుండా ఉండాలని ఆమె గట్టిగా నిర్ణయించుకున్నారు. అందుకే, కోయంబత్తూరు ఆశ్రమంలో, డిసెంబర్ 1న అత్యంత ప్రైవేట్‌గా వివాహ వేడుకను ప్లాన్ చేసుకున్నట్టు తెలుస్తోంది.

ఈ వార్త నిజమైతే, టాలీవుడ్ సినీ పరిశ్రమలో ఇది నిజంగా హాట్ టాపిక్‌గా మారనుంది. అధికారిక ప్రకటన కోసం సమంత అభిమానులు ఆసక్తిగా ఎదురుచూస్తున్నారు. అయితే, ఈ శుభవార్తపై ఆమె కానీ, ఆమె టీమ్ కానీ ఇప్పటివరకు ఎలాంటి స్పష్టత ఇవ్వలేదు.

వివాహంతో పాటు ఆమె వృత్తిపరమైన జీవితం కూడా జోరుగా ఉంది. ‘మా ఇంటి బంగారం’ వంటి సినిమాలు, ‘రక్త్ బ్రహ్మాండ్’ వంటి వెబ్ సిరీస్‌ల పనుల్లో ఆమె బిజీగా ఉన్నారు. పెళ్లి తరువాత కూడా ఆమె నటనను కొనసాగిస్తారని, ఈ విషయంలో ఎలాంటి సందేహాలు అవసరం లేదని ఆమె సన్నిహితులు చెబుతున్నారు.