ఆంధ్రప్రదేశ్ ఎన్నికల్లో వై.ఎస్.ఆర్ కాంగ్రెస్ పార్టీ ఘోర పరాజయాన్ని చవిచూసింది. అధికారం కోల్పోగానే సాధారణంగా జరిగేదే జరిగింది. ముఖ్యమంత్రి వైఎస్ జగన్ మోహన్ రెడ్డి పక్కన హడావిడి చేసిన నేతలు, అధికారులు ఒక్కొక్కరుగా పక్కకు తప్పుకున్నారు.
కొందరు పార్టీ కార్యక్రమాలకు దూరమైతే, మరికొందరు సైలెంట్గా సొంత పనుల్లో మునిగిపోయారు. చివరికి చూస్తే, జగన్ పక్కన మిగిలింది కేవలం ఒకే ఒక్క కీలక వ్యక్తి—ఆయనే సజ్జల రామకృష్ణారెడ్డి.
పార్టీ అధికారం కోల్పోయిన వెంటనే సజ్జల రామకృష్ణారెడ్డి ప్రభుత్వ సలహాదారు పదవికి రాజీనామా చేశారు. ఆ తర్వాత దాదాపు పది నెలల పాటు ఆయన చాలా మౌనంగా ఉండిపోయారు. పాలకపక్ష కూటమి (టీడీపీ, జనసేన, బీజేపీ) సజ్జలపై భారీ స్థాయిలో కేసులు నమోదు చేస్తుందని, ఆయనను అరెస్ట్ చేస్తుందని పెద్ద ఎత్తున ప్రచారం జరిగింది.
కానీ, టీడీపీ నేతలు ఊహించిన స్థాయిలో గానీ, ఆరోపించిన స్థాయిలో గానీ సజ్జలపై ఎలాంటి పటిష్టమైన ఆధారాలు దొరకలేదని తెలుస్తోంది. అందుకే గత కొన్ని నెలలుగా సజ్జల రాజకీయంగా తిరిగి యాక్టివ్ అయ్యారు.
ఈ ధైర్యంతోనే సజ్జల ఇటీవల ప్రెస్మీట్లలో తెగ దూకుడు ప్రదర్శిస్తున్నారు. ప్రస్తుత ప్రభుత్వం టీడీపీ నేతలపై ఉన్న కేసులను ఉపసంహరించుకోవడం వెనుక వారికి ఉన్న భయమే కారణమని ఆయన గట్టిగా విమర్శించారు.
అంతేకాదు, వైఎస్సార్సీపీ మళ్లీ అధికారంలోకి వస్తే, ముఖ్యమంత్రి చంద్రబాబు నాయుడుపై ఉన్న కేసులన్నింటినీ తిరిగి తెరిచి, సమగ్ర విచారణ జరిపిస్తామని సజ్జల బహిరంగంగా ప్రకటించడం విశేషం. పది నెలల మౌనం తర్వాత, సజ్జల నోటి నుంచి ఇంతటి రాజకీయ హెచ్చరిక రావడానికి కారణం జగన్ ఇచ్చిన అభయమే అని రాజకీయ పరిశీలకులు భావిస్తున్నారు.
వైసీపీ అధికారంలో ఉన్నప్పుడు అన్ని శాఖలపైనా సజ్జల పెత్తనం చెలాయించారని ప్రతిపక్షం తీవ్రంగా ఆరోపించేది. అటవీ భూములు ఆక్రమించారనే ఆరోపణలు, మంగళగిరిలోని టీడీపీ కార్యాలయంపై దాడి కేసులో లుకౌట్ నోటీసు వంటి న్యాయపరమైన సవాళ్లు సజ్జలకు ఎదురయ్యాయి.
అయితే, ముందస్తు బెయిల్ తెచ్చుకోవడం, ఆరోపణలకు సరైన ఆధారాలు దొరకకపోవడం వంటి కారణాల వల్ల ఆయన చట్టపరమైన చిక్కుల నుంచి బయటపడగలిగారు. అందుకే టీడీపీ నేతలు ఆయన్నే పార్టీ పతనానికి కారణమంటూ విమర్శిస్తున్నా, ఆయనే త్వరలో జైలుకు వెళ్లక తప్పదంటూ హెచ్చరిస్తున్నా, YSRCP కార్యకర్తల నుంచి సజ్జల మీద విమర్శలు చేస్తున్నవేళ కూడా సజ్జల మాత్రం చెక్కుచెదరలేదు.
జగన్ నమ్మకం – వైఎస్సార్సీపీకి ఆయనే ‘యాంకర్’..!
పార్టీ ఓటమి తర్వాత పలువురు నేతలు సజ్జలను పక్కన పెట్టాలని జగన్ను కోరినప్పటికీ, ఆయన మాత్రం ఆ మాట వినలేదని తెలుస్తోంది. జగన్ దృష్టిలో సజ్జల రామకృష్ణారెడ్డి ఇప్పటికీ నంబర్-2 స్థానంలోనే ఉన్నారు. వైఎస్ జగన్ ప్రస్తుతం బెంగళూరు నుంచి విజయవాడకు టూర్ ప్లాన్ చేసుకుంటున్న నేపథ్యంలో, రాష్ట్రంలో పార్టీ వ్యవహారాలను నడిపించేందుకు, నేతలకు దిశానిర్దేశం చేసేందుకు సజ్జలపైనే పూర్తి బాధ్యత పెట్టారు.
దీన్ని బట్టి చూస్తే.. ఎన్నికల ఓటమి తర్వాత కూడా సజ్జల రామకృష్ణారెడ్డి వైసీపీలో మరింత కీలకం కాబోతున్నారన్నది సుస్పష్టం. నేతలంతా భయంతో పక్కకు తప్పుకుంటున్న వేళ,జానీవాకర్లా (ఒంటరిగా పోరాడేవాడిలా) నిలబడిన సజ్జల, రాబోయే రోజుల్లో వైఎస్సార్సీపీ రాజకీయ పోరాటానికి ముందుండి నడిపించే కీలక వ్యక్తి కావడం ఖాయం.
