తెలంగాణ రాజకీయాల్లో మరో కీలక ఘట్టం ఆవిష్కృతమైంది. గ్రామ పంచాయతీ ఎన్నికలకు సంబంధించి ఇందిరమ్మ సర్కార్ అత్యంత ముఖ్యమైన నిర్ణయాన్ని తీసుకుంది. రిజర్వేషన్లపై గత కొంతకాలంగా నెలకొన్న ప్రతిష్టంభనకు తెరదించుతూ, డెడికేటెడ్ కమిషన్ నివేదికను రాష్ట్ర మంత్రివర్గం ఆమోదించింది.

నిజానికి, కాంగ్రెస్ ప్రభుత్వం బీసీలకు 42 శాతం రిజర్వేషన్లు కల్పించాలని జీవో జారీ చేసింది. కానీ, ఇది సుప్రీంకోర్టు విధించిన 50 శాతం పరిమితిని మించిపోవడంతో హైకోర్టు దానిపై స్టే విధించింది.అధిక శాతం ఇవ్వాలనుకున్నా న్యాయపరమైన చిక్కులు తప్పలేదు.

దీంతో న్యాయస్థానం ఆదేశాలను గౌరవిస్తూ, 50 శాతం పరిమితికి లోబడే రిజర్వేషన్లు అమలు చేయాలని కమిషన్ తాజాగా సిఫార్సు చేసింది. ఈ సిఫార్సులకు క్యాబినెట్ ఆమోదముద్ర వేసింది. దీంతో ఇక స్థానిక సంస్థల ఎన్నికలకు లైన్ క్లియర్ అయినట్లే.

శనివారం (నేడు) పంచాయతీరాజ్ శాఖ ఈ రిజర్వేషన్ల ఖరారుకు సంబంధించి అధికారిక జీవోను జారీ చేయనుంది. ఈ ఉత్తర్వుల ప్రకారం, గ్రామ పంచాయతీలు, వార్డులలో ఎస్సీ, ఎస్టీ, బీసీ రిజర్వేషన్లను అధికారులు ఖరారు చేస్తారు.

అధికారులు చురుగ్గా పనులు పూర్తి చేయనున్నారు. ఎంపీడీఓలు వార్డులకు, ఆర్‌డీఓలు సర్పంచ్ పదవులకు రిజర్వేషన్లను ఫైనల్ చేస్తారు. మహిళలకు కేటాయించాల్సిన స్థానాలను రాజకీయ పార్టీల సమక్షంలో లాటరీ పద్ధతిలో కేటాయించనున్నారు. శని, ఆదివారాల్లో జిల్లా యంత్రాంగం ఈ ప్రక్రియను పూర్తి చేస్తుంది.

ఈ హడావిడి వెనుక ప్రధాన కారణం ఉంది. కేంద్రం నుంచి గ్రామ పంచాయతీలకు రావాల్సిన దాదాపు ₹3000 కోట్ల గ్రాంటు మార్చి 31, 2026 నాటికి గడువు ముగుస్తుంది. ఈ గ్రాంటు చేజారిపోకుండా ఉండాలంటే డిసెంబర్ నాటికి ఎన్నికలు నిర్వహించాల్సిన అవసరం ఉంది. అందుకే, కోర్టు కేసుల ఇబ్బందులు ఉన్నా, కేవలం గ్రామ పంచాయతీ ఎన్నికలకే ముందుకు సాగాలని ప్రభుత్వం నిర్ణయం తీసుకుంది. ఆర్థిక ప్రయోజనాన్ని దృష్టిలో ఉంచుకుని ఈ నిర్ణయం తీసుకున్నారు.

రిజర్వేషన్ల ప్రక్రియ పూర్తయిన వెంటనే రాష్ట్ర ఎన్నికల సంఘానికి ప్రభుత్వం లేఖ రాయనుంది. నవంబర్ 24న హైకోర్టులో దీనిపై విచారణ ఉన్న నేపథ్యంలో, ఎన్నికల ఏర్పాట్ల వివరాలను కోర్టుకు సమర్పించనున్నారు. న్యాయస్థానం అనుమతి లభిస్తే, నవంబర్ 24 లేదా 25వ తేదీలలోనే ఎన్నికల షెడ్యూల్‌ను ఎలక్షన్ కమిషన్ విడుదల చేసే అవకాశం ఉంది. కాగా, పార్టీపరంగా మాత్రం 42% బీసీలకు టికెట్లు ఇస్తామని కాంగ్రెస్ ప్రభుత్వం ఇప్పటికే ప్రకటించింది.